A oposición de Muxía paralizou a aprobación das dedicacións do goberno en minoría de Toba

A historia repítese en Muxía, e o goberno en minoría de Iago Toba (PSOE, 7) sufriu o seu primeiro revés desta lexislatura ao aliarse os tres grupos da oposición (PP, 3; IxM, 2; e BNG, 1) para facer valer a súa maioría e paralizar “por falta de diálogo” as dedicacións exclusivas propostas polo executivo.

Os voceiros dos tres grupos políticos coincidiron á hora de pedirlle ao alcalde “que fale coa oposición para buscar un consenso” e asuma “que preside un goberno municipal que está en minoría”.

A proposta contemplaba un salario de 42.240 € brutos anuais para Toba, e outras dúas dedicacións exclusivas para os concelleiros Olalla Benlloch e Javier Romar, por importe de 25.200 euros brutos. O alcalde acusa á oposición de non aportar “argumentos” para xustificar o seu posicionamento, “pois son uns importes dos máis baixos de toda a Costa da Morte, polo que este movemento non responde a cuestións salariais ou económicas”.