Santa Baia de Chacín recobra vida
As estruturas da igrexa barroca do século XVI que aínda se conservan foron consolidadas para evitar que sigan deteriorándose
Para celebrar as melloras o Concello organizou un concerto musical que xuntou preto de setenta veciños
O obxectivo é avanzar cara unha rehabilitación integral
![Veciños e veciñas da parroquia de Santa Baia de Chachín gozando do concerto musical](https://estaticos-cdn.prensaiberica.es/clip/979bafa9-efdf-4035-9375-370696cb501c_16-9-aspect-ratio_default_0.jpg)
Veciños e veciñas da parroquia de Santa Baia de Chachín gozando do concerto musical / c. de mazaricos
A veciñanza da parroquia de Santa Baia de Chacín (Mazaricos) volveu encher de vida a vella igrexa para gozar dun concerto musical e celebrar a consolidación do conxunto histórico. Trátase dun impresionante templo barroco do século XVI, que permanecía en estado de abandono dende o último cuarto do século XX e que foi obxecto de obras de consolidación e mantemento da estrutura logo dun acordo entre o Concello e o Arcebispado de Santiago. Actualmente, atópase libre de maleza e a estrutura reforzouse para evitar a degradación do lugar.
Antes de que comezase a soar a música, o técnico de Cultura do Concello de Mazaricos, Xesús Jurjo, fixo un repaso sobre a historia do lugar e o seu vencello con algúns personaxes históricos mazaricáns.
Pola súa banda, o alcalde, Juan José Blanco, dirixiuse aos veciños lembrando que “xa hai varios anos que comezamos o proxecto de conservación deste ben patrimonial”. Subliñou que ademais do seu valor turístico, “entendemos que ten un valor sentimental para a veciñanza da parroquia, e por iso quixemos que fosedes vós os primeiros en gozar deste recinto”, sinalou en referencia aos veciños e veciñas.
Anunciou asemade que seguirán facendo melloras neste espazo. Nos últimos dous anos, a igrexa pasou de ser unha estrutura en estado de ruína e cuberta de maleza a converterse nun espazo limpo e aberto onde o conxunto histórico loce con todo o seu esplendor.
As actuacións acometidas centráronse na limpeza da maleza que mantiña semioculto o templo e a consolidación das estruturas que aínda seguen en pé. O tellado, lamentablemente, caeu. A intención do goberno local, segundo o rexedor, é poder acometer unha rehabilitación integral da igrexa, pero as actuacións terán que realizarse a medida que dispoñan dos fondos necesarios.
De momento, e para celebrar esta acción de recuperación do patrimonio local, preto de setenta veciñas e veciños da parroquia gozaron dun concerto do grupo Music Glam, en colaboración co artista Anxo, celebrado dentro do recinto histórico da igrexa parroquial.
A actuación incluíu música clásica, versións máis modernas, e coñecidos temas galegos como "Camariñas" ou "Lela", e mesmo bandas sonoras de películas como A Misión e series como Xogo de Tronos. Unha actuación que foi moi aplaudida polos asistentes.
A música seguiu soando durante a fin de semana en Mazaricos, xa que na noite do pasado sábado, no campo da feira da capital municipal, actuaron Os Festicultores, o grupo máis festeiro de Galicia, que presentou o espectáculo Festicultura, o millor para sandar as amarguras. Un concerto que veciños e visitantes poideron gozar de balde.
- El Correo Gallego - Diario de la capital de Galicia
- La lluvia reaparece en el verano de Galicia: este es el pronóstico de MeteoGalicia para el fin de semana
- La misa y ofrenda floral en honor a Rosalía de Castro congregan a más una treintena de instituciones gallegas
- Dos menores heridas en Muros al saltar desde un puente cuando pasaba un barco por debajo
- Impresionante chalet de ensueño en Santiago de Compostela: a 10 minutos del centro y 30 de la playa, todo un lujo a buen precio
- Esta es la aldea gallega que se encuentra al borde de los acantilados más altos de Europa: en la provincia de A Coruña
- La ola de calor se atenúa en Galicia: el alivio será temporal porque así se prevé el tiempo
- Os premios Alba de Compostela conseguen unir a todos os membros da Corporación local