Galicia homenaxea a Luísa Villalta

Hoxe venres, 17 de maio, a Real Academia Galega celebra un pleno extraordinario con motivo do Día das Letras, dedicado este 2024 a Luísa Villalta. Será na cidade da Coruña, lugar de nacemento, residencia e un espazo literario constante na obra de Villalta. O evento, que principia ás 12:30 h no Teatro Rosalía, será un tributo á destacada dramaturga, poeta, narradora, ensaísta e articulista galega.

A sesión pública, de entrada libre ata completar a capacidade, contará con tres discursos: os de Ana Romaní, Margarita Ledo e Euloxio R. Ruibal. Estes académicos profundarán en distintos aspectos da vida e obra de Luísa Villalta, que pese á súa morte prematura, aos 46 anos de idade, deixou un enorme legado literario.

A parte musical correrá a cargo da violinista da Real Filharmonía de Galicia, Kiyoko Ohashi, e a cantante e poeta coruñesa Estíbaliz Espinosa. O repertorio elixido busca reflectir os gustos eclécticos de Villalta, quen, aínda que abandonou a música como profesión, mantívoa como fonte de inspiración ao longo da súa vida.

Este acto central do Día das Letras Galegas é só unha parte das homenaxes que se lle están a render a Luísa Villalta. Desde xaneiro, a RAG promove a súa figura e legado a través da serie documental web Luísa Villalta, a rebelión da palabra, dirixida por Damián Varela Pastrana e realizada por Miramemira.

Recursos divulgativos

Ademais, a RAG ofrece diversos recursos divulgativos sobre Luísa Villalta na súa sección web dedicada ás Letras Galegas 2024. Ana Romaní proporciona unha biografía detallada da autora, así como unha selección de citas da súa obra. Para o público máis novo, lanzouse a web Primavera das Letras, onde se poden atopar actividades interactivas, fichas para colorear e o conto Violino, Inglesa e o libro xigante, unha iniciativa que achega de maneira lúdica a figura da escritora aos máis pequenos.

SUPLEMENTO ESPECIAL EN PDF DAS LETRAS GALEGAS 2024

SUPLEMENTO ESPECIAL EN PDF DAS LETRAS GALEGAS 2024