Formoso apela aos indecisos para “defender as pensións ou os dereitos laborais” o 23-X

O secretario xeral do PSdeG, Valentín González Formoso, apelou onte á mobilización dos indecisos de cara á última semana de campaña. Segundo dixo, “o que nos xogamos” nestas eleccións é ter un “goberno sensible” que defenda as pensións, os dereitos laborais ou impulse as bolsas para o estudantado, “fronte a un que ameace todo isto”.

Miñones destaca o apoio do Goberno á pesca e os 22 millóns investidos na Costa da Morte

Palabras de Formoso durante a visita que fixo á estación de Renfe de Santiago para realizar o traxecto en tren ata A Coruña, co obxectivo de reivindicar os abonos de balde aprobados polo goberno de Pedro Sánchez para paliar os efectos da inflación. O líder do PSdeG estivo acompañado polo cabeza de lista ao Senado na provincia, Xosé Sánchez Bugallo. Para Formoso, os abonos de balde para o tren son un exemplo do “goberno sensible” que tivo España nos últimos cinco anos. Nesta liña, puxo en valor as rebaixas aos combustibles e as axudas a pescadores, agricultores ou transportistas galegos no peor da pandemia, así como a suba das pensións, o salario mínimo ou a rebaixa das facturas da luz.