CA creará unha empresa pública para aforrar custos nos servizos das instalacións municipais

Compostela Aberta (CA) anunciou onte en rolda de prensa que, se gaña as eleccións do vindeiro domingo, porá en marcha a creación unha empresa pública que xestione de forma directa servizos como a limpeza ou a conserxaría das instalacións municipais. Unha empresa que ademais de permitir aforrar custos, fronte aos servizos que agora ofrecen empresas externas, tamén melloraría as condicións laborais das traballadoras e traballadores.

Segundo explican en nota de prensa, esta nova empresa municipal tamén asumiría o Servizo de Axuda no Fogar (SAF).“Trátase de procurar un mellor servizo para a veciñanza, unhas mellores condicións laborais para os traballadores e un aforro para o Concello”, explicou a candidata María Rozas. “Hai moitas experiencias que nos din que supón un importante aforro para a administración”, e fixo referencia á USC, que asumiu a xestión directa de todos os seus centros, nos dous Campus que lle custaban 8 millóns de euros e agora ten un aforro de 800.000 euros anuais.