Sold out na presentación do festival Maré: primeiro concerto de MARO en Galicia

Tras o recente lanzamento de «hortelã», a multi-instrumentista, compositora e produtora de Lisboa MARO deu vida a unha versión íntima e despoxada das súas cancións máis recentes, nunha liña de folk acústico. En formato trío, cos guitarristas cataláns Darío Barroso e Pau Figueres, actuou onte nun Salón Teatro ateigado que coreou dende a primeira ata a última canción.

O concerto de MARO enmárcase dentro da presentación da edición 2023 do festival Maré, que terá lugar do 20 ao 24 de setembro en diversos puntos da cidade de Santiago de Compostela. Un evento que aposta pola creación feminina e da mocidade, a experimentación, as novas linguaxes artísticas e a diversidade cultural, poñendo o foco naqueles territorios cos que Galiza comparte lazos lingüísticos, históricos e outros sentimentais das dúas beiras do Atlántico.