Unha alumna da USC, terceira de España na proba do MIR: “Vou facer anestesia e quedar en Santiago”

Unha estudante de Medicina da USC, Rebeca Aldaz, foi a terceira de España nas probas de acceso á Formación Sanitaria Especializada, segundo os resultados dados a coñecer polo Ministerio de Sanidade. Ademais, outros dous alumnos da universidade compostelá acadaron o primeiro posto nas súas probas, Iria Sanjuán en Farmacia e Iago Facal en Física. Entre os dez primeiros tamén conseguiron situarse Saúl López en Física e Helena González en Química.

A número tres do MIR sinala en conversa con EL CORREO GALLEGO que agora a súa intención é facer a especialidade de anestesista e quedar en Galicia, probablemente en Santiago porque “fun moi feliz estes anos alí”. De orixe pamplonesa, Aldaz indica que “o que abarca a anestesia é que máis me gusta a min da medicina, porque é moi ampla, ten cousas de quirófano, de coidados intensivos, de tratamento da dor... É moi completa e o meu perfil encaixa máis como anestesista”. Ademais, vese desenvolvendo a súa carreira na capital galega no futuro. “Pode parecer un pouco cedo para decidir algo así, pero é algo no que penso”, sinala.

El verano de 2024 se complica en los hospitales y centros: tutores y MIR alertan de la posible falta de médicos

Resultado inesperado

A pesar dos nervios que viviu na proba e da “intensa” preparación da mesma durante varios meses, Aldaz agora amósase “moi feliz”. Un estado de ánimo que comparte Iria Sanjuán, que agardaba estar “entre os trinta primeiros” do FIR tras rematar o exame con boas sensacións, pero “non contaba con quedar de primeira”. Así, relata que “avisáronme da academia de que saíran os resultados, entrei na páxina do ministerio e quedeime en branco total. Estou nunha nube”.

Durante os próximos catro anos, Sanjuán ten previsto facer a especialidade de Farmacia Hospitalaria en Vigo despois de realizar prácticas no mesmo eido en Ferrol, a súa localidade natal. “Se teño a oportunidade, despois querería quedarme en Galicia, sen dúbida”, asegura. A súa fase de preparación da proba tamén foi “curta, pero intensa. Son moitas horas ao día de estudo, é algo que podes manter uns meses, pero non máis tempo”, indica.

Pola súa banda, Iago Facal, tampouco agardaba ser o mellor na proba de Física. “A noticia pilloume por sorpresa totalmente. Estaba botándolle estes días un ollo á páxina e cando o vin tiven que mirar varias veces para asegurarme”. A partir de agora espéranlle tres anos en radiofísica, sendo Santiago a súa opción preferencial e coa vista posta no futuro centro de protonterapia como posibilidade de futuro. “Aí hai unha saída interesante”, remarca.

El Centro de Protonterapia gallego impulsará la investigación gracias a sus dos aceleradores

Vocación

Algunhas profesións elíxense por vocación e noutros casos a motivación aparece de maneira inesperada. É o caso de Iago Facal, que explica que “inicialmente o meu plan era facer un doutoramento en física da materia, pero un familiar meu enfermou de cancro, e aí deime conta de quería tentar axudar, non a este familiar, pero si poñer o meu gran de area para que outras persoas poidan superar a enfermidade”.

Para Iria Sanjuán, a carreira de Farmacia foi unha elección clara porque lle gustaba a rama sanitaria, “pero non a nivel asistencial. Mirando as carreiras, pensei varias opcións, pero logo vin que Farmacia tiña moita saída e que podía ter a parte clínica de hospital, e por outra parte, o que me gustaba a min tamén da química”.

Rebeca Aldaz tivo que elixir entre dúas posibilidades das que estaba “namorada”. Fixo prácticas durante os últimos cursos do seu grao en Medicina de Familia e Anestesia, e acabou optando finalmente pola segunda.