Galicia chega á capital francesa a través da mostra ‘Os camiños de Ramón Chao’

Galicia está presente na capital francesa a través da mostra Os camiños de Ramón Chao, que poderá verse ao longo deste mes de xuño na sede do Instituto Cervantes de París (11, Avenue Marceau). Trátase dunha exposición que arranca tras a preestrea do documental de Aser Álvarez O camiño de Ramón Chao. Tras as pegadas de Prisciliano, que se amosou ao público o pasado 23 de maio en París. Dito documental vía a luz a raíz da novela de Ramón Chao Prisciliano de Compostela, de 1999, traducida a varios idiomas.

En Prisciliano de Compostela, Chao relata unha viaxe en motocicleta dende o bulevar de Montparnasse da capital francesa ata terra galega, seguindo o percorrido vital do bispo de Ávila, Prisciliano de Gallaecia, decapitado en Tréveris no ano 385 tras denunciar a corrupción da Igrexa católica e ser acusado de herexía polo goberno secular.

A mostra que se exhibe na capital francesa conta coa colaboración da Asociación Cultural Amigos de Prisciliano, presidida polo xornalista Moncho Paz. “Nela poden verse fotografías, libros, obxectos persoais, recortes de prensa e lembranzas da familia Chao”, sinala Moncho a este diario. “Son 6 vitrinas e nunha delas están recollidos os libros que Chao (son da súa autoría) doou ao Instituto Cervantes de París”, indica. Xunto a Moncho Paz organizaron a mostra Antoine Chao (fillo do homenaxeado) e Aser Álvarez. Por certo que os tres queren agradecer ao Instituto a boa disposición que amosaron para pór en marcha esta exposición.

Ramón Chao

O xornalista e escritor Ramón Chao nace en 1935 en Vilalba, Lugo. Dende ben pequeno recibe formación como pianista e con 11 anos obtén unha beca para estudar música e bacharelato en Madrid. No 56 recibe unha nova beca da Comisaría de Educación Popular para estudar en París, onde tras catro anos entra na Radio Francesa, dende onde fai emisións en castelán, galego e francés.