Anxo Carracedo, un doutor con TDAH no Milladoiro

O Trastorno por Déficit de Atención e Hiperactividade (TDAH) é un dos máis frecuentes no neurodesenvolvemento dos nenos, e adoita causarlles problemas de exceso de actividade; á hora de prestar atención ou ben controlar condutas impulsivas. Pero por sorte, pódese controlar eficazmente, e mesmo mellora a sintomatoloxía co paso do tempo. Pois ben, os responsabeis do IES do Milladoiro quixeron divulgar esta doenza cunha das autoridades mundiais na matería: o doutor Anxo Carracedo quen, baixo o título de O reto do TDAH, trasladou os últimos avances e factores tanto positivos coma negativos que caracterizan este déficit.

Deste xeito, o “eminentísimo doutor Carracedo, especialista en TDAH e presidente da fundación Ingada (o Instituto Galego do TDAH e Trastornos Asociados), cativou os presentes co seu discurso sobre a posta en valor, recoñecemento e importancia do axeitado tratamento”, trasladaba Sonia Magariños dende a subdirección deste centro de Secundaria.

Carracedo comezou cunhas nocións básicas de xenética, considerando a diversidade “como elemento valioso, necesario e consubstancial coa propia existencia que, cando xera sufrimento propio ou ao entorno máis próximo, pasa a situarse no campo do trastorno”. Este é o caso desta alteración neurobiolóxica que pode orixinar problemas, especialmente dentro dos sistema educativo convencional, onde a competitividade, a aprendizaxe memorística ou a rixidez supoñen un obstáculo para este alumnado. Pero hai máis. porque este eminente facultativo foi diagnosticado con TDAH, e logrou situar a súa experiencia de vida “como un exemplo de superación deste obstáculo na que xogou un papel decisivo o apoio da súa familia que premiou o esforzo, en detrimento do valor numérico das cualificacións”.

Pero o doutor confirma que este trastorno tamén leva aparellado aspectos positivos, como a creatividade ou o dinamismo, aínda que “pode ocasionar importantes complicacións, especialmente as derivadas da impulsividade que deben ser tratadas”, recoñeceu. E a medicación pode ser, neste sentido unha axuda para mellorar a calidade de vida.

Determinante

Segundo o testemuño prestado diante da comunidade educativa da meirande urbe amesá, inflúe a xenética, “pero é determinante o ambiente e este último que explica a maior prevalencia deste trastorno nuns ámbitos xeográficos fronte a outros”, segundo aportaba na súa ponencia. Neste punto, o científico destacou a importancia de adaptar o sistema educativo e impulsar o seu cambio, apostando pola aprendizaxe significativa e os valores fronte ás actuais esixencias memorísticas e de contidos poñendo o acento en potenciar as habilidades persoais.

E como bo TDAH, “Carracedo non parou de moverse interactuando, respondendo a preguntas e entaboando un dialogo espontáneo e cheo de emoción cos asistentes”, segundo constataban dende a organización. “A todos nos deixou abraiados co seu vitalismo e xenerosidade. Agradecemos que fora quen de facer un oco na súa axenda para compartir connosco o seu coñecemento e experiencia vital”, rematan.

Para contactar co Ingada pódese chamar ao 722 521 381 ou escribir un email (info@fundacioningada.net).