Silleda falará francés e italiano coa viaxe dos 27 ‘irmáns’ de Canéjan e Poggio

Os actos de irmandamento na comarca do Deza seguen a dar os seus froitos, e Silleda acollerá do 24 de agosto ao 31 a 16 persoas de Canéjan (Francia) e 11 de Poggio Mirteto (Lazio, Italia), dúas vilas coas que o municipio silledense mantén a fraternal relación dende hai anos.

O programa deseñado polo Comité de Xestión de Proxectos Europeos de Silleda (Coxesi) en colaboración co Concello e distintas asociacións do municipio comezará o xoves 24, coa chegada dos participantes e a súa recepción no Centro Social de Cortegada, para posteriormente aloxarse nas casas das familias acolledoras. A programación de actividades deste intercambio cultural baséase en dar a coñecer o patrimonio histórico e natural e a gastronomía de Silleda. Tamén se farán roteiros tendo o medioambiente e o rural como protagonistas.

O venres 25 realizarase unha excursión a Ourense para visitar a súa catedral, o casco histórico e por suposto, As Burgas. Ás 20.00 horas, na Praza Siñor Afranio de Silleda, terá lugar o concerto que ofrece a Banda de Música Municipal de Silleda, aberto e de balde a calquera que queira asistir. Xa o sábado 26 será o día en familia. Tanto o grupo do intercambio como as familias acolledoras visitarán o Museo do Campo e a Mecanización. O xantar farase na Carballeira de Siador e pola tarde, o grupo Xirandola impartirá un obradoiro de música tradicional neste espazo natural.

Na xornada do domingo 27, o grupo fará un percorrido por Silleda para coñecer a Fervenza do Toxa e o conxunto Histórico-Relixioso de Abades (no que se inclúe a igrexa románica de Santa María e o Santuario da Virxe dos Desamparados). O xantar dese día será en Ansemil-Martixe, onde se degustarán callos e panceta, cociñados pola Asociación Veciñal de Ansemil-Martixe e pola Asociación Cultural O Cruceiro de Breixa visitando pola tarde o mosteiro de Carboeiro.

O luns 28 haberá unha ruta pola comarca do Deza para visitar o Pazo de Liñares, o Muíño Cuíña, o Pazo Anzuxao e Castro Deza, mentres que na xornada do martes 29 realizarase unha saída a Santiago de Compostela, onde o grupo de intercambio terá o día libre nesta cidade.

Pra rematar, o mércores 30 visitaranse os murais do programa Mulleres de Extramuros en Cortegada e as instalación de Trasdeza Natur. Pola noite terá lugar a cea de despedida, tendo como protagonista a paella, o prato estrela de Cortegada.

Está previsto que nos actos participen membros das asociacións e colectivos que integran o Comité de Irmandamento. O Concello agradece a colaboración de Coxesi, Aveccuco, Xirandola, Banda de Música Municipal de Silleda, Asociación Veciñal de Ansemil-Martixe, Asociación Sociocultural de Cortegada, Asociación Feiral da Semana Verde e ao Museo do Campo e a Mecanización, Asociación O Cruceiro de Breixa, o grupo de Acordeóns da Escola de Música, pandereteiras As Ferreñas de Cortegada e a charanga Os Empanaos, así como ás familias que acollen aos participantes no programa.

Hay que lembrar que Silleda impulsou en maio de 2018 de forma oficial un comité de Irmandamento integrado por representantes de dezanove asociacións. A entidade, que se chama Comité para a Xestión de Proxectos Europeos do Municipio de Silleda (Coxesi), contou coa presidencia de Belén Calvo Costa, e na súa directiva integráronse membros de colectivos de carácter tanto social como cultural ou veciñal. Este novo colectivo vía a luz cuns fines moi concretos, como son o de promover a participación activa do municipio en na Unión Europea a través de programas, iniciativas e intercambios con otros países, algo que xa quedou demostrado dabondo. Ademais, tenta acadar o incremento da colaboración internacional en materia de solidariedade e fraternidade, a dinamización económica e a promoción dos intercambios sociaiss.

O rexedor, xa daquela Manuel Cuíña, explicaba que o obxectivo final deste comité pasaba por “traballar polo benestar dos veciños e o desenvolvemento de accións conxuntas para dinamizar o noso pobo”.