Medra a demanda de centolas e ameixas para conxelar e tentar aforrar na cesta do Nadal

Achégase o Nadal e con el a que se podería chamar “costa do marisco”, pois cada día que pasa o consumidor ve como os prezos das especies máis demandadas, como as centolas ou as ameixas, non deixan de subir. É por iso que cada vez son máis as familias que avogan por anticiparse a esa escalada facendo compras por adiantado e conxelando o produto para aforrar na cesta navideña. “É algo que se vén facendo dende hai varios anos, pero cada vez o fai máis xente”, afirma Rosa Mari Carabel, da Pescadería Antonio, do mercado de Carballo.

Alerta, non obstante, de que “non é o máis aconsellable, porque aínda que hai especies que conxelan moi ben, con outras perdese moito, sobre todo coas ameixas e outros mariscos que se comercializan vivos”. Ademais, Rosa Mari Carabel asegura que a contía do aforro “vai depender máis do tempo, xa que se van ao mar e hai produto a diferenza nos prezos de agora ao Nadal non vai ser tan grande, e consumir o marisco fresco ten un valor engadido”.

Alerta en el litoral de Galicia: en Santiago, chubascos intermitentes este viernes

Suba de prezos

Á marxe das contas que fai cada quen, tanto a demanda como as cotizacións xa aumentaron nas últimas semanas. Na Pescadería Antonio “a máis solicitada é a ameixa, e este ano temos o problema da escaseza”, afirma a súa responsable. Esta semana venderon a babosa a 38 €/kg na praza de abastos, “e vai subir máis”, adianta Rosa Mari, quen lembra que o pasado ano “chegouse a vender a 50 €/kg”. A centola tamén se revalorizou. “Nós traémola do Grove e estes días pagouse a 35 €/kg”.

Toneladas de marisco muerto arrastradas por el temporal en la ría de Muros-Noia: "Sobrevivirá muy poco"

En canto aos peixes, a pescada do pincho experimentou unha importante alza, acadando as mellores pezas prezos de entre 17 e 20 euros o quilo, namentres que o abadexo sitúase entre 14 e 17€/kg, “porque hai abundancia”, afirma Rosa Mari. Outras especies como o linguado, o rodaballo ou o sargo acadan valores semellantes aos dos mellores mariscos. “O sargo pagouse ata 63 €/kg na lonxa de Laxe; o rodaballo supera os 48 €/kg; e o linguado sitúase entre 42 e 44 €/kg, polo que estas especies comercializámolas preferentemente por encargo”, engade.

Aínda así, as expectativas desta campaña de Nadal “son boas”. Na referida pescadería xa teñen encargas para a Noiteboa e fin de ano, sobre todo de centolas, ameixas e nécoras, “e sen prezo, porque non o sabemos, pero é xente que confía en nós”, conclúe Rosa Mari Carabel.

Plataformas en liña

Ademais da tradicional venda de peixes e mariscos nas prazas de abastos, nos últimos anos están a gañar mercado as plataformas de comercializacion online. No porto de Muros ten a súa sede Fresco y del Mar, unha empresa que vende peixes e mariscos capturados de xeito artesanal, maioritariamente nos litorais de Costa da Morte, Muros-Noia e Barbanza.

Emilio Louro, responsable de loxística, asegura que “dende hai un mes xa temos pedidos de xente que se quere anticipar ao Nadal, e prefire conxelar o produto para poder aforrar”. A raíña nas demandas que reciben en Fresco y del Mar “é, sen dúbida, a centola, pero o problema é que nos últimos días escasea”.

Unha das vantaxes desta modalidade de compra é que na empresa carnotana os prezos de Nadal xa están fixados dende esta semana, “e os clientes xa poden facer as reservas sabendo o que lles vai custar a cea de Noiteboa ou de fin de ano”. E iso sen perder frescura e sen necesidade de conxelar o produto, “pois servímolo fresco e o consumidor é quen fixa a data na que o quere recibir”, afirma. Outra das ventaxas é que “servimos o produto na casa, sen que o cliente teña que desprazarse a ningún mercado”, subliña Emilio Louro.

Para este Nadal ofrecen centolas femias a 56€/kg e macho a 51€/kg; ameixa babosa a 43,5 €/kg; berberecho a 38€/kg o grande e a 30 o mediano. Quenes opten polos percebes terán que rascarse máis o peto, pois os de calidade extra teñen un prezo de 300€/kg; 260 o grande; 195 o mediano e 95 o pequeno.

O mesmo terán que facer quen gusten do lumbrigante. Na lonxa de Corcubión pagouse entre 40 e 50 euros o kilo, un prezo que aumentará notablemente cando chegue á mesa, ao igual que o da centola, que acadou esta semana os 30€/kg, o prezo máis alto rexistrado até agora na rula local.