A tradicional matanza do porco xunta centos de veciños e visitantes na aldea lalinense de Anzo
O exemplar, de 184 quilos, foi transportado nun carro tirado por vacas
Os asistentes degustaron produtos típicos
Houbo exposición de apeiros e oficios, teatro e música
![Veciños e visitantes seguindo o despece do porco na Matanza de Lalín](https://estaticos-cdn.prensaiberica.es/clip/524db400-5b22-4068-ae4b-9ed0a812ba50_16-9-discover-aspect-ratio_default_0.jpg)
Veciños e visitantes seguindo o despece do porco na Matanza de Lalín / Concello de Lalín
J. M. Ramos
A casa de Golmar de Anzo acolleu este sábado a XXIV Matanza Tradicional de Lalín, unha celebración organizada conxuntamente pola veciñanza das parroquias de Anzo e Busto e que contou cunha elevada participación de veciños e visitantes. “Foi unha das edicións máis sobresaíntes e completas xa que contou con moitas actividades e representacións de carácter etnográfico”, subliñan dende o Concello.
O porco foi un exemplar lalaíno de 184 quilos en canal, que foi transportado como tradicionalmente se facía, nun carro tirado por vacas e levado ao lugar do seu despece. Tras a Matanza, houbo unha degustación de produtos típicos como costela, torresmos e chourizos. A maiores, a veciñanza aportou unha gran diversidade de sobremesas típicas.
A celebración foi narrada e comentada polo xornalista Manuel Vilariño e polo Cronista Oficial de Lalín, Daniel González Alén, que achegaron aos visitantes aspectos historiográficos, etnográficos, culturais e ata anecdóticos ao redor deste evento que está tan enraizado nas tradicións lalinenses.
Houbo tamén varias representacións de carácter etnográfico, como unha exposición de apeiros de labranza e de antigos oficios, a representación da chegada dunha emigrante de Bos Aires, o afiado de gadañas, a escarocha do millo, a escenificación dun escribán que redactaba todo tipo de documentos relacionados coa vida dunha parroquia, e unha regueifa da torna da auga, moi representativa das antigas liortas entre veciños. Non faltou tampouco a música, da man de Carballeira de Cercio e do Trío 3.com.
O alcalde José Crespo, agradeceu a total dispoñibilidade que os veciños destas dúas parroquias tiveron dende o primeiro momento para ser organizadores da Matanza, da man da comisión organizadora integrada por veciños de ambas dúas parroquias e dos concelleiros de Festas, José Cuñarro, e de zona, Marcos Mariño. Agradeceu tamén á familia Cortizo (ao matrimonio conformado por José Luis Cortizo Vila e María José Méijome Pérez e ao seu fillo e nora, Rubén Cortizo Méijome e Ana Valladares González) a cesión da casa fidalga e as súas construcións anexas para levala adiante. Trátase dun inmoble singular con hórreo, palleira, lareira, portada de madeira, eira enlousada de pedra, entre outros moitos elementos singulares.
Á celebración, enmarcada nos actos da Feira do Cocido, asistiron tamén o conselleiro de Cultura, o presidente da Deputación de Pontevedra e unha nutrida representación de membros da Corporación local.
- El Correo Gallego - Diario de la capital de Galicia
- La lluvia reaparece en el verano de Galicia: este es el pronóstico de MeteoGalicia para el fin de semana
- La misa y ofrenda floral en honor a Rosalía de Castro congregan a más una treintena de instituciones gallegas
- Dos menores heridas en Muros al saltar desde un puente cuando pasaba un barco por debajo
- Impresionante chalet de ensueño en Santiago de Compostela: a 10 minutos del centro y 30 de la playa, todo un lujo a buen precio
- Esta es la aldea gallega que se encuentra al borde de los acantilados más altos de Europa: en la provincia de A Coruña
- La ola de calor se atenúa en Galicia: el alivio será temporal porque así se prevé el tiempo
- Os premios Alba de Compostela conseguen unir a todos os membros da Corporación local