Costa da Morte queda libre da praga da couza da pataca seis anos despois de detectarse en Muxía

A última actualización de zonas demarcadas pola presenza da praga da couza guatemalteca da pataca, publicada pola Consellería do Medio Rural no Diario Oficial de Galicia, confirma que a Costa da Morte queda libre da Tecia solanivora povolny despois de seis anos, cando se detectou a súa presenza en Muxía e en varios concellos limítrofes.

Por iso, a Xunta levantou a prohibición do cultivo de pataca –medida que se mantiña para evitar a expansión da couza deste tubérculo– na parroquia de Caión, na Laracha, e tamén nas de Chamín (Santaia) e Corrizo (San Pedro), en Arteixo; e en todo o Concello de Burela.

Polo tanto, poderán plantarse patacas en todo o municipio da Laracha, “pero coa obriga, no caso de Caión, de comunicar á Xunta a sementeira na totalidade das parcelas, xa que esta parroquia pasa a ser zona tampón”, afirman dende o Concello larachés. Un trámite que se pode realizar dende as oficinas municipais. Ademais, segundo informan dende o goberno local, que preside José Manuel López, “a parroquia de Lendo, ata o de agora zona tampón, pasa a ter a consideración de zona libre para o cultivo da pataca, polo que decaen as medidas que estaban establecidas para a contención da praga”.

La Indicación Xeográfica Protexida Pataca de Galicia produce unos 6,2 millones de kilos anuales

Pola contra, Medio Rural declarou como novas zonas infestadas as parroquias de Abegondo, Cabanas, Figueroa e Sarandós, no Concello de Abegondo; as de Cañás e Paleo, no municipio de Carral; e as de Barallobre e Maniños, de Fene.

Ao tempo, mantense a prohibición de plantar pataca nas parroquias de A Pedra, en Cariño, e San Xurxo de Moeche, en Moeche. En Lugo, a prohibición do cultivo deste tubérculo segue a manterse na parroquia de Santa María de Trabada, no Concello homónimo.

Ademais son zonas tampón –espazos límite de contención en lugares que lindan con zonas infestadas e nas que se pode plantar pataca comunicando o cultivo–, as parroquias de Cerneda, Folgoso, Mabegondo, Meangos, Montouto e Viós, en Abegondo; a das Somozas, no Concello homónimo; Laraxe, en Cabanas; Vigo, en Cambre; Cariño, Landoi e Sismundi, en Cariño; as parroquias de Beira, Quembre, Sergude, Tabeaio e Vigo, en Carral; Régoa, en Cedeira; As Encrobas, en Cerceda; e Castelo, en Culleredo.

Tamén son zonas tampón Limodre, Magalofes e Perlío, en Fene; Labecengos, San Xoán de Moeche e Santa Cruz de Moeche, no Concello de Moeche; Franza e Piñeiro, en Mugardos; e Ferreira e Lamas, en San Sadurniño. E na provincia de Lugo, San Xusto de Cabarcos, en Barreiros; Santo Tomé de Lourenzá e Santo Adrao de Lourenzá, no municipio de Lourenzá; A Fórnea, A Valboa, Sante, Vidal e Vilapena, no Concello de Trabada.

Os agricultores das novas zonas infestadas deberán declarar as existencias de pataca almacenada na oficina rural máis próxima, en calquera dos lugares e rexistros establecidos na normativa reguladora ou a través da sede electrónica da Xunta, utilizando o código de procedemento MR465B. A pataca almacenada será retirada polos servizos oficiais para proceder á súa destrución, e os produtores poderán solicitar unha demnización.

Avance significativo na contención

A praga da couza guatemalteca detectouse por primeira vez en Galicia no 2015, e a Consellería do Medio Rural tivo que prohibir o seu cultivo en varios concellos das provincias da Coruña e Lugo de cara a procurar a súa erradicación.

Na actualidade, os datos de seguimento a través da rede de moinitorización da Xunta, que conta con 2.100 trampas no territorio para realizar análises sistemáticas, “mostran un avance significativo na súa contención, previa a unha posible erradicación”, subliñan dende Medio Rural.

En varias zonas demarcadas non se detectou a presencia deste organismo durante dous anos, o que fai posible o levantamento das medidas fitosanitarias de erradicación. Lembran dende a Administración autonómica que no 2019 rexistrouse o momento de máxima expansión da couza guatemalteca, chegando a estar infestados 35 concellos. Neste tempo investíronse 5,2 millones de euros no Plan de choque contra a praga.

Suscríbete para seguir leyendo