Os vándalos cébanse cunha mesa de granito da área de recreo larachesa de Gabenlle

O Concello larachés denuncia publicamente o acto vandálico rexistrado durante a Semana Santa na área recreativa de Gabenlle, que se saldou con importantes danos nunha das mesas de granito que están a disposición dos usuarios nun dos espazos de lecer e esparexemento de referencia no termo municipal da Laracha.

A Policía Local investiga os feitos e solicita a colaboración cidadá para tratar de dar coas persoas responsables destes actos.

Ao mesmo tempo, o Concello está a tomar as medidas oportunas e nos próximos días levaranse a cabo as actuacións necesarias para reparar os danos e que o mobiliario da área recreativa volva estar á maior brevidade nas mellores condicións para os seus usuarios.

A Laracha impulsa un plan estratéxico para a posta en valor dos seus recursos naturais

Desde o Concello “laméntase o sucedido e ínstase tanto á cidadanía larachesa como aos visitantes a desfrutar dos espazos públicos e os seus equipamentos de xeito responsable”, sinalan.

En 2022, o Concello xa tivo que facer fronte a un gasto de 4.000 € para repoñer nove balizas do alumeado do paseo de Caión, obxecto tamén dun acto vandálico.