Segundo encontro enoliterario do Bela Fisterra

O hotel Bela Fisterra acolle o sábado, día 25, o segundo Encontro Enoliterario, un espazo de confraternidade entre escritores, escritoras e lectores, que se complementa con cen dos mellores viños de Galicia por Alex e Luis Paadín. "Os viños son de balde e os libros non se venden", afirma Pepe Formoso, xerente do establecemento hoteleiro.

A filosofía é que non existan atrancos para achegarse ao encontro e crear sinerxias entre figuras xa consagradas e noveis, ademais de abrir un escaparate para escritores e escritoras que se queiran dar a coñecer.

Conversa literaria de Modesto Fraga e Rafael Mouzo ao redor da figura de Don Emerito en Fisterra

A cita está pensada igualmente para que o sector turístico da Costa da Morte "poida catar viños e ver cales son os que mellor encaixan nas cartas dos seus establecementos a partir do asesoramento persoal dos Paadín", subliña Formoso. Un xeito ameno e informal de coñecer viños das cinco Denominacións de Orixe e as IXP de Galicia.