o bono turístico e tamén o seguro coronavirus se fose necesario TEXTO M. Lavandeira
Galicia confía en que este sexa o ano grande do sector turístico
O vicepresidente primeiro da Xunta, Alfonso Rueda, reafirmou no Foro Finisterrae a aposta do Goberno galego polo sector turístico con estímulos encamiñados a facer do 2022 o ano grande de Galicia da man do Xacobeo.
Nun encontro con empresarios, no que participaron tamén o alcalde de Fisterra, José Marcote; o delegado da Xunta, Gonzalo Trenor; o director xeral de Sabadel Gallego, Pablo Junceda; o presidente do Clúster de Turismo de Galicia, Cesáreo Pondal, e o vicepresidente do referido ente e presidente da Asociación Solpor, Jesús Picallo, o vicepresidente salientou a importancia dos fondos europeos para apuntalar a recuperación turística iniciada o ano pasado e informoulles das vantaxes para os seus negocios do Plan Xacobeo Next Generation, dotado con 39,2 millóns de euros, ou do Plan Camiña, que dun total de 46,6 millóns, conta cunha partida específica de 21,6 para o sector.
A Xunta puxo en marcha o Plan Camiña co obxectivo de seguir reactivando o sector con achegas directas para a adaptación dos seus negocios aos estándares de calidade que demanda o turismo do século XXI e para animar aos galegos a consumir na rede hoteleira e hostaleira da nosa comunidade. Ademais dos 21,6 millóns específicos para o tecido empresarial -para a mellora dos establecementos turísticos, o incremento da calidade, a aceleración de iniciativas turísticas e a formación e profesionalización do persoal-, o Plan Camiña destina 21,7 millóns a entidades locais e outros 3,3 para iniciativas encadradas no turismo de familia, para estratexias postas en marcha polas universidades galegas e para entidades sen ánimo de lucro.
A maiores, o tecido turístico galego poderá beneficiarse tamén do Plan Xacobeo Next Generation, que destina 22,7 millóns á posta en valor de 12 monumentos catalogados como Bens de Interese Cultural (BIC), ademais de 8,3 millóns para accións de cohesión en destino e 8,1 millóns máis para plans de sustentabilidade turística en destino. Rueda indicou que esas inversións no patrimonio e na posta en marcha de iniciativas turísticas sostibles e de calidade redundarán en beneficio do sector, tendo en conta que “o Camiño de Santiago e o Xacobeo son patrimonio de todos os galegos”.
Rueda recordou que a Xunta xa investiu o ano pasado 120 millóns de euros na recuperación do sector e que este ano seguirá na mesma liña, destinando axudas directas ao tecido empresarial e renovando campañas de éxito como a do bono turístico para reactivar o consumo.
Entre as iniciativas que tiveron mellor acollida o ano pasado e que van seguir vixentes este ano figura o seguro coronavirus, unha iniciativa pioneira e imitada por outras comunidades autónomas e que deu un plus de confianza aos turistas ante un posible contaxio da covid, xa que lles garantiza a cobertura de todos os gastos sanitarios. O seguro, no que se investiu un millón de euros, seguirá vixente ata o mes de maio. “Pero de ser necesario, prorrogarase -indicou Rueda-. Ogallá non faga falta e poidamos desfrutar do ano grande que Galicia merece”.
Tamén se vai renovar o bono turístico, unha iniciativa igualmente pioneira que permitiu mobilizar 7,7 millóns de euros.
Vicepresidente primeiro da Xunta de Galicia
Alfonso Rueda asegurou que “vivimos no mellor lugar do mundo e o mundo ten que sabelo”. Salientou que coas medidas adoptadas xunto o “sentidiño”, a responsabilidade e o compromiso do sector e da sociedade galega en xeral, deron moi bos resultados. Así, a ocupación hoteleira de decembro confirmou que Galicia é a segunda comunidade autónoma con maior recuperación turística, case 25 puntos por riba da media. Pechou o 2021 cun incremento de case o 90 % de ocupación hoteleira en relación á do 2020 e, no acumulado do ano, leva 4,1 millóns de viaxeiros e case 9 millóns de noites, sumando os hosteleiros e extrahoteleiros ata o mes de novembro.
Recordou aos empresarios que “Galicia está de moda” e que ten unha oportunidade única ante “unha década xacobea” da que toda a sociedade galega sairá beneficiada”.
Despois dos primeiros brotes verdes no sector turístico ao longo do pasado ano, hai que aproveitar o Xacobeo 2022 para apuntalar a reactivación dun colectivo que sufriu en primeira liña a crise provocada pola covid. Profesionais e Xunta coinciden en que as expectativas para este exercicio son moi boas e, de cumprirse, podería confirmarse unha volta á normalidade plena. Para iso segue a ser moi importante o respaldo das administracións públicas, e dende a Xunta aseguran que van seguir apoiando e apuntalando o sector turístico, que é un dos piares da economía galega. Os profesionais, pola súa banda, agardan que os fondos Next Generation cheguen tamén ás pymes do sector. A reactivación non pode deixar a ninguén atrás.