Millonario apoio provincial a 42 obras en Barbanza e Noia-Muros
O Plan Único (POS+2022) da Deputación Provincial da Coruña alcanzará este ano os 10.897.857 euros investidos nos concellos das comarcas do Barbanza e de Muros-Noia, dos que 3,6 millóns de euros xa teñen como destino o financiamento dun total de corenta e dúas obras (uns números que se irán incrementando ao longo do ano cos fondos adicionais do plan) e preto dun millón de euros destínase a financiar gastos sociais nos municipios, para protexer aos colectivos máis vulnerables.
En total, a Ribeira correspóndenlle 1.868.656 €; a Boiro 1.325.840 €; a Mazaricos 1.241.682 €; a Noia 926.654 €; a Muros 920.403 €; a Porto do Son 910.700 €; a Outes 890.300 €; a Rianxo 812.365 €; a Lousame 715.727 €; á Pobra 658.097 €, e a Carnota 627.521 €.
O Plan Único achega nesta ocasión 884.587 € aos once concellos das dúas comarcas para gastos sociais. As contías repartidas para tal fin nos diferentes municipios oscilan entre os 51.875 € de Carnota e os 133.761 € de Ribeira. Boiro recibe 111.083 €; Lousame 57.719 €; Mazaricos 97.002 €; Muros 70.422 €; Noia 76.658 €; Outes 73.319 €; A Pobra do Caramiñal 57.586 €; Porto do Son 82.214 €, e Rianxo 72.942 €.
Reforzo do persoal adscrito aos departamentos de Servizos Sociais e á axuda no fogar, creación de axudas para a cobertura de necesidades básicas como vivenda, alimentación, gastos médicos e farmacéuticos ou escolarización dos colectivos máis vulnerables son algunhas das cuestións ás que os concellos están a destinar estes fondos.
Dentro do plan, todos os concellos das comarcas de Barbanza e Muros-Noia executarán un total de corenta e dúas obras de humanización de rúas e espazos públicos, melloras nas redes de iluminación e saneamento, renovación de estradas, actuacións en instalacións municipais ou accións para incrementar a seguridade peonil, entre outras.
Polo que respecta ó Barbanza, entre os investimentos que se financian no concello de Ribeira (que recibe 903.569 €) destacan a ampliación das pistas deportivas de Samil-Corrubedo (116.339 €), a renovación do parque de A Capela (179.566 €) e a construción dun novo parque infantil en Artes (114.838 €).
No municipio de Boiro (que recibe 524.453 €) inclúense a mellora de beirarrúas en Pedra da Bouza (182.164 €) e a urbanización das rúas Tenencia e Pesqueira (100.546 €). En Rianxo (que recibe 264.792 €) inclúese a renovación da cuberta do polideportivo Rosalía de Castro (171.432 €). A Pobra ten para investimentos 78.123 €.
Pola súa banda, xa no tocante á comarca de Muros-Noia, en Outes (que obtén 377.061 € para investimentos) fináncianse a humanización da rúa Esperante (167.575 €) e a mellora do pavillón polideportivo da Serra de Outes (62.352 €).
En Noia (171.020 €) destacan a renovación de pavimentos na rúa da Igrexa, Santa Cristina de Barro, Carracido, Pereiro de Arriba, Obre e outros núcleos rurais (171.020 €), e en Porto do Son, a humanización do calexón Outonil e a construción de beirarrúas en Eiravedra, O Pozo, Coira e Freixedo (335.195 €).
CAMIÑOS ES ESTRADAS. Finalmente, entre os concellos que apostan por mellorar camiños e estradas municipais con cargo a esta liña anual de axudas da institución provincial coruñesa figuran os de Muros (412.353 euros), Lousame (146.782 euros), Carnota (173.969 euros) e Mazaricos (285.512 euros).
delegribeira@elcorreogallego.es
Presidente da Deputación Provincial da Coruña
O presidente provincial, Valentín González Formoso, remarcou a utilidade deste programa para “contribuír á reactivación económica, cun investimento moi importante que este ano alcanza os noventa millóns de euros na provincia, mellorar infraestruturas e servizos municipais e dar apoio aos concellos nos seus diferentes programas sociais”. Uns fondos que, ademais, se distribúen “en base a criterios obxectivos, como a poboación, a superficie, o número de parroquias ou o esforzo fiscal de cada municipio”, segundo sinalou ao respecto o presidente de dita institución, Valentín González Formoso.
1 Alumeado público ou recollida de lixo. Seis concellos das comarcas de Barbanza e Muros-Noia destinan parte dos fondos do Plan Único deste ano a financiar gasto corrente, que inclúe servizos básicos como o alumeado municipal ou a recollida de lixo. Para tal fin, Carnota terá 79.307 €; Lousame 164.911 €; Mazaricos 277.150 €; Noia 219.024 €; A Pobra do Caramiñal 164.531 €, e Rianxo 36.974 €. Suman en total 941.900 euros. Outros cinco municipios destinan este ano parte dos fondos a redución de débeda. Trátase dos de Boiro (23.803 €); Carnota (11.116 €); Muros (15.090 €); A Pobra do Caramiñal (12.339 €) e Ribeira (28.663 €). Nese apartado as aportacións suman 91.013 €.
2 Liberdade para decidir o destino dos fondos. O Plan Único ofrece aos concellos da provincia da Coruña unha total liberdade á hora de decidir en que investir os fondos que lles achega a Deputación Provincial, segundo destaca o seu presidente, Valentín González.