Revalorizarán a arquitectura e a paisaxe da ribeira do Anllóns

A Deputación Provincial da Coruña e os alcaldes dos concellos da Laracha, Cabana, Carballo, Coristanco e Ponteceso formalizaron o convenio marco do denominado Proxecto Anllóns, entre cuxos obxectivos está o de promocionar e desenvolver un modelo de turismo sostible a través de iniciativas que teñan o río Anllóns como eixo central.

Co obxecto de preservar a biodiversidade e o patrimonio natural propio desta comarca, o proxecto contemplará accións de recuperación do bosque de ribeira e a erradicación da flora alóctona e plantas invasoras en ámbitos próximos ao río, que serán complementadas con diversas accións divulgativas entre a comunidade escolar.

Entre as iniciativas a incluír no proxecto tamén se valorarán as relacionadas co patrimonio inmaterial e a identidade cultural vinculada ao río Anllóns, como poden ser a recuperación de sendeiros de pescadores, a posta en valor de lendas e de historias de tradición oral ou iniciativas relativas a infraestruturas fluviais, como por exemplo as minicentrais ou os muíños de batán.

A formalización deste convenio, que ten unha duración inicial de 4 anos, chega despois da súa aprobación en acordo plenario no pasado mes de xullo. As súas bases detallan o procedemento a levar a cabo para a xestión conxunta do proxecto, para o que deberán redactarse unha memoria e un plan director.

O espazo de cooperación estará impulsado e dirixido a través dun órgano colexiado que se denominará Consello de Dirección e que estará formado por dous representantes de cada unha das corporacións participantes, incluída a Deputación Provincial da Coruña, que prestará tamén apoio administrativo, asesoramento xurídico e económico.

O mencionado convenio foi asinado na sede provincial polo presidente da Deputación, Valentín González Formoso, e polos cinco alcaldes: José Manuel López (A Laracha), José Muíño (Cabana de Bergantiños), Evencio Ferrero (Carballo), Juan Carlos García (Coristanco) e Lois García Carballido (Ponteceso).

No acto participou tamén o vicepresidente e deputado de Turismo, Xosé Regueira, quen explicou que o “proxecto pretende poñer en valor, en primeiro lugar, a riqueza ecolóxica e a biodiversidade do trazado do río Anllóns, mais tamén desenvolver accións relacionadas co patrimonio innmaterial e mesmo coa identidade cultural relacionada co propio río”. Neste sentido, salienta a importancia do propio trazado do cauce, que nace na parroquia de Soandres, no concello da Laracha, e percorre a comarca natural vertebrándoa ata desembocar no estuario de Anllóns, en Ponteceso.

Pola súa banda, o alcalde de Cabana, José Muíño, afirmou que Proxecto Anllóns “é por fin unha realidade”, e avanzou que “o acordo vai posibilitar explotar un recurso paisaxístico de beleza incomparable, como é o río e especialmente o esteiro, e seguir apostando por un turismo sostible e de calidade”.

Neste sentido, o rexedor cabanés agradeceu “a disposición do resto de institucións implicadas e que fixeron posible o proxecto”. Unha iniciativa que se vén fraguando dende hai máis de dous anos, pero que se viu freada durante este tempo a causa da crise sanitaria da COVID.