Vinte e sete anos de artesanía en vivo no castelo de Vimianzo
O Concello de Vimianzo inaugurou este martes a XXVII Mostra de Artesanía en Vivo do castelo, coa que pretende enaltecer o valor dos produtos manufactureiros de toda a Costa da Morte. O acto estivo presidido pola alcaldesa, Mónica Rodríguez, e o deputado provincial, José Manuel Pequeño Castro.
De darlle vida á mostra encargaranse preto de vinte artesáns desde o 15 de xullo ata o 15 de setembro, e tamén durante todo o ano as fins de semana. Oleiros da vila malpicá de Buño, un maquetista de barcos, as artesás Asociación de Amigos do Liño de Galicia, a asociación de Palilleiras As Nemanquiñas de Vimianzo; a artesanía en prata e soprado de vidro, a asociación de Veciños o Santiaguiño de Carreira de Zas e a artesanía do trenzado da palla deBaíñas volverán a amosar o seu bo facer e a exhibir os seus produtos na fortaleza da capital de Soneira. Tamén a asociación Aspadex, de Cee, conta cun posto de venda das creacións dos seus usuarios.
Ademais, ao longo do verán, a fortaleza da capital de Soneira fará partícipes aos visitantes que se acheguen a visitar a exposición artesanal, xa que o Concello programou para os meses de xullo e agosto un fiadeiro, obradoiros de olería e maquetación para aprender a elaborar barcos e nasas, talleres de encadernación e de soplado de vidro, unha panillada, e outras actividades para tecer o liño ou a palla.
O acto inaugural contou con varias actuacións musicais, a cargo do grupo de gaitas Trubisquiña e o dúo Queimán e Andrea Pousa. Ademais, houbo unha representación teatral a cargo da compañía Os Quinquilláns, que se encarga tamén das recreacións históricas que se organizarán no verán no marco das visitas guiadas ao castelo.
A mostra artesanal é, dende hai vinte e sete anos, un dos referentes turísticos da Costa da Morte, xa que conseguíu transformar o castelo nun museo vivo polo que cada ano pasan milleiros de visitantes chegados de moi diversos puntos de España e tamén do extranxeiro.
Durante a tempada de verán poderá visitarse de martes a domingo, de 10.30 a 14.00 e 16.00 a 20.30 horas. O luns está pechado o castelo.
A alcaldesa, Mónica Rodríguez, deu a benvida aos asistentes ao castelo, ao que definiu como “o emblema do noso pobo, polo que nos coñecen en todo o mundo”. Un lugar máxico, engadiu, “que non podería brilar sen todas e cada unha das persoas que aquí amosan o seu arte”. Dirixiuse aos artesáns e artesás para dicirlles: “Sodes únicos e facedes único este lugar”, ao tempo que lle agradeceu o seu esforzo durante este tempo de pandemia.
“Sodes a parte primordial para que este lugar teña algo que non posúe ningún outro en toda a contorna”, concluíu.
PENDÓN. Previamente á inauguración da mostra, a rexedora, que estivo acompañada polos alcaldes de Zas, Dumbría e Corcubión e súa homóloga de Camariñas, ademais de concelleiros do grupo de goberno, presidiu a baixada do Pendón, un acto que marca cada ano o comezo das actividades do Asalto ao Castelo, unha recreación histórica que este ano tampouco se poderá celebrar, aínda que haberá algunhas actividades para lembrar as revoltas Irmandiñas.
o noso”
Alcaldesa de Vimianzo
A alcaldesa de Vimianzo, Mónica Rodríguez, asegurou que “temos a obriga, desde as administracións, de preservar o noso e concienciar da relevancia do patrimonio, en todas as súas modalidades”, porque forma parte da “nosa sociedade e da identidade propia”, sendo parte “eterna do noso modo de vida”.
Pola súa banda, o deputado José Manuel Pequeño, sinalou que “como representante da Deputación provincial, é unha honra asistir á presentación da vixésimo sétima Mostra de Artesanía en Vivo nun ben patrimonial da envergadura do castelo de Vimianzo, outro atractivo máis da Costa da Morte e que é unha actividade asentada na nosa contorna”, afirmou
Estaba previsto que tamén participase no acto o presidente da Deputación, Valentín González, pero non foi posible por problemas de axenda. Non obstante, o mandatario provincial quixo agradecer “o inconmensurable esforzo por parte dunhas persoas que forman parte do selo de identidade dun pobo, da Costa da Morte e de toda a comunidade galega”.
Destacou tamén “o potencial que presenta a combinación de patrimonio arquitectónico e cultural transformándoo na Mostra, integrada por persoas vidas de todos os recunchos da Costa da Morte e que é digna de ver, en vivo, coas súas demostracións e observando o produto de primeira man”.
O CASTELO de Vimianzo, que no seu día foi escenario das revoltas dos Irmandiños, hoxe é un espazo máxico no que se dan a man a historia e a tradición. Séculos de acontecementos e vivencias que actualmente se divulgan a través de celebracións como o tradicional Asalto ao Castelo, as representacións teatrais e as visitas guiadas para que, veciños e visitantes, coñezan de primeira man o que nesa fortaleza aconteceu. Unha historia que dende hai 27 anos se complementa coa presenza de artesás e artesáns que manteñen vivos vellos oficios que eles souberon converter en arte. Unha mestura que fixo deste espazo histórico unha sinal de identidade do municipio vimiancés. Só cabe esperar que o siga sendo durante moitos séculos máis.