Liberdade

Facultade natural que ten o home para decidir o seu modo de actuar, sen determinacións exteriores.

Atentado contra a liberdade. Liberdade baixo fianza. Dereito á liberdade de expresión. Liberdade condicional. Liberdade sen cargos. Liberdade de acción. Liberdade de culto. Liberdade de prensa. Vivir en liberdade. A menos liberdade máis hipocrisía. Necesito practicar a parresia, forma parte da miña liberdade, da miña forma de ser. A liberdade gáñase. Privilexio.

Sei que a liberdade só vale para quen pode escoller. Necesito liberdade para eu ser eu, considéroa imprescindible para ter ás, para non ser un escravo. Obrigáronme a non ser libre de pensamento, por iso non puiden ser eu mesmo de verdade, educáronme para ser un sumiso. Quero ser libre para dicir o que penso, para expresar o meu eu. Quero non ter medo a ser libre. Quero liberdade para non seguir a frecha. Quero ser libre para ser único, un artista ou un revolucionario, para poder abrazar a vida e a morte. Necesito ser eu mesmo: distinto. Privilexio.

Odio as barreiras. Non quero que ninguén me castre, quero chamarlles ás cousas polo seu nome. Non ao puritanismo -feminismo extremo- e si á liberdade sexual. Quero liberdade para poder buscar o meu Paraíso perdido. Quero liberdade para respectar a túa liberdade máis ca a miña. Quero sentirme libre para comer da mazá prohibida. Quero ter liberdade para equivocarme e ata para quitarme a vida. Quero ter liberdade para rebelarme ante as inxustizas. Onde hai máis imaxinación atoparás máis liberdade. Privilexio.

A timidez limita a liberdade. A liberdade de expresión ten donos. Para algúns a verdadeira liberdade: só, e nunha illa, porque non falta quen postula que a mellor compañía é a dun mesmo e os que din, probablemente sen segundas intencións, que o home é o único animal que se acompaña só. A liberdade só é posible conservala someténdoa á escravitude das leis. Coa liberdade só non se come, necesítase orde. O de propagar vulgaridades, violencia e pornografía a través da televisión din que é liberdade de expresión e eu pregúntoche: Estás de acordo? O medo é o límite da nosa liberdade. Privilexio.

Sen orde non hai liberdade e sen liberdade non hai democracia. Se se está a favor da liberdade de expresión, hai que facelo con todas as consecuencias. Só existe verdadeira liberdade nos nosos soños. Prefiro a seguridade ben entendida á liberdade mal entendida. Liberdade non é facer o que che dá a gana. Quero a liberdade para que ti me digas o que non me gusta. A Estatua da Liberdade (Os Estados Unidos) é considerada Patrimonio da Humanidade pola Unesco. No cemiterio de Père-Lachaise (París) hai un monumento dedicado “Á memoria de todos os españois mortos pola liberdade 1939-1945”. Hai homes que morren por pedir pan e liberdade. Privilexio.

A liberdade, Sancho, é un dos agasallos máis preciosos que aos homes deron os ceos (Cervantes). O único valor no que creo é a liberdade (Cioran). A liberdade non consiste en ter un bo amo, senón en non telo (Cicerón). Non estou de acordo co que dis, pero defenderei coa miña vida o teu dereito a expresalo (Voltaire). O pobre non é libre; en todas partes é un servo (Voltaire). Teoría da xustiza (John Rawls): cada persoa ha ter un dereito igual ao máis amplo sistema total de liberdades básicas, compatible cun sistema similar de liberdade para todos. Máis vale liberdade con pobreza ca prisión con riquezas (refrán español). O que poida ser libre non se cative (refrán galego). “A liberdade supón responsabilidade. Por iso a maior parte dos homes a temen tanto” (G. BernardShaw). Liberdade non é facer o que se quere, é non facer o que non se quere (Rousseau). Un recordo: o Café de Flore no Boulevard Saint-Germain de París, por onde pasan «os camiños da liberdade» (Jean-PaulSartre). Así lle cantaba eu á liberdade, cando aínda non me faltaba o alento e o candor da mocidade: Recorda amiga sirena / que ao pé da alba espero, / para facerme ás ondas mariñeiro / dun barco sen cadeas. Non, por suposto que non me esquezo do poema de PaulÉluard, aquel que foi lanzado en paracaídas dende avións ingleses ao París ocupado:

Nos campos, no horizonte

nas ás dos paxaros

no muíño das sombras

escribo o teu nome.

E polo poder dunha palabra

volvo vivir

nacín para coñecerte

para cantarche

liberdade.