O autor Genaro da Silva desenmascara o poeta romántico no libro 'Flor negra'
Flor negra, de Genaro da Silva, é o título do novo lanzamento de Chan da Pólvora Editora, un libro sobre o desexo e os medos antes do desexo que desenmascara ao poeta romántico cunha das máis arriscadas propostas da poesía galega recente. Flor negra, que vén ser unha caste de proba de madurez para Da Silva, presentouse onte na homónima libraría da editorial,en Compostela, nun acto no que participou o propio autor xunto ao director do selo, Antón Lopo.
Da Silva enfrontouse ao seu libro coa noción de que a poesía é "unha forma de coñecemento" que a el lle permite achegarse "mediante a linguaxe a aquilo que a linguaxe non consigue dicir". Para Da Silva, "a poesía debe abrir xanelas, ser liminar perante o descoñecido; o poeta debe correr riscos".