Boiro impulsa a primeira campaña de dinamización demográfica coa USC
Convocan un concurso en busca de propostas para lograr aumentar o número de habitantes
O Concello de Boiro está a colaborar coa Universidade de Santiago de Compostela para realizar un concurso de dinamización demográfica e territorial, o primeiro que se leva a cabo nun municipio da comunidade galega.
O obxectivo principal desta iniciativa é conseguir propostas para aumentar o número de habitantes.
Segundo informaron onte dende o goberno municipal que preside o alcalde José Ramón Romero, a administración local boirense vai poñer en marcha este interesante proxecto que comezou a desenvolverse despois dos contactos mantidos entre o executivo local e o departamento de Xeografía da citada universidade, en concreto, co profesorado-investigador que na actualidade imparte a materia de Xeodemografía do Grao en Xeografía e Ordenación do Territorio.
Esta proposta ten unha doble finalidade. Por un lado, fomentar no alumnado a posta en funcionamento dun proxecto que se poida levar a cabo nun municipio e, polo outro, poñer en práctica as súas ideas para aumentar o número de habitantes da localidade de Boiro, ante o reto de chegar aos vinte mil habitantes.
No mencionado certame que convoca o Concello poden participar alumnos, xa titulados, das tres universidades galegas.
Para poder participar, os interesados poden presentar as súas propostas ata o vindeiro día trinta de abril.
As persoas que finalmente resulten ser as autoras da proposta gañadora da convocatoria recibirán unha gratificación económica de trescentos euros. Ademais, o premio consiste tamén na posta en marcha da súa iniciativa.