Cordeiro mariñado en olivas e romeu e ensalada de cogombro e ravos

O cordeiro non é tan común na cociña galega, pero si aparece nas nosas mesas en días especiais ou de tempo en tempo. A tendencia inicial é a cociñalo nunha cama de tomate, allo, cebola e en ocasións pementos, como fariamos con calquera outra carne. Non obstante, as opcións para preparar unha peza de cordeiro son moi amplas e aquí presentamos unha bastante sofisticada. A diferenza estará en mariñar a carne con olivas e romeu, o que lle dará un sabor moi marcado e singular. Para todos os que se atrevan coa innovación, aquí van os pasos que cómpre seguir.

O primeiro será preparar o noso mariñado. Para iso, mesturar as olivas, o allo, a raiadura do limón, o seu zume, as follas de romeu, unha cullerada de mel e o viño tinto. Batelo todo ben. Ó mesmo tempo, colocar a nosa peza de cordeiro nunha fonte fonda, non metálica, e facer varios cortes na superficie. Inmeditamente, botar o noso mariñado sobre a carne, poñendo moita atención para que entre nos pequenos ocos que fixemos na peza. O truco aquí está en deixar a carne mariñar durante varias horas. Obviamente, a máis tempo, máis sabor collerá.

Cando consideremos que o mariñado xa fixo o seu efecto na carne, poñemos a peza de cordeiro nunha fonte para forno e, coidado!, non esquecer reservar o noso líquido de mariñar. Sobre o tempo de forno, dependerá como sempre do tipo e potencia do noso electrodoméstico, pero hai que comezar cunha hora e arredor de 190 graos. Tras esa primeira hora, podemos engadir na mesma fonte do cordeiro as nosas patacas, cortadas en cadradiños, con sal e un pouco de aceite de oliva.

Cordeiro e agora patacas deben ser cociñadas por outra hora máis no forno, pero convén darlles algunhas voltas ás patatas de vez en cando. Cando consideremos que o noso cordeiro está no seu punto, pasalo a outra fonte, como tamén faremos coas nosas patacas.

As racións do noso cordeiro e o seu acompañamento poden ser presentadas cun pouco da salsa de mariñar ó carón do prato. Para quen queira unha salsa un pouco máis contundende, engadirlle fariña ó noso líquido de mariñar así como auga ata que atopemos o punto que queiramos.

Para alixeirar a nosa comida ou cea, nada mellor que poñer na nosa mesa unha ensalada adaptada á estación do ano. Como aínda estamos en verán, propoñemos unha ensalada de cogombro, ravos e cebola vermella. O único que hai que facer é cortar en toros moi finiños cada un destes ingredientes (cada toro debería ser case transparente), engadir sal ó gusto e mesturalo todo nun prato de ensalada.

A innovación nesta receita está no aliño. Para variar do recorrido aceite e vinagre, podemos utilizar un aliño no que o elemento que destaque sexa o pomelo. Para unha ensalada para cinco persoas, mesturar un pouquiño de mostaza, media cullerada de azucre, cinco culleiradas de vinagre de viño branco e outras cinco culleradas de aceite de oliva extra virxe.

O último toque que podemos engadirlle a esta ensalada, aínda que estaría xa perfecta, serían unhas folliñas de menta. Claro que non é fácil atopar menta, así que a opción quedará para aqueles amantes de cultivar herbas aromáticas nos seus xardíns.

Como dixemos ó inicio desta receita, o cordeiro non adoita aparecer en moitas mesas en Galicia e, cando o fai, acostuma facelo en forma de costeletiñas. Non obstante, pode ser máis económico comprar unha peza grande e pedirlle ó noso carniceiro que a divida en anacos que despois poderemos utilizar en varias ocasións. Para os amantes dos datos, a maioría do cordeiro que habitualmente se compra en supermercados, procede de Nova Celandia.

INGREDIENTES (Para 5 persoas)
1kg e medio de cordeiro
Para o mariñado:
100 gr. de olivas
300 ml. de viño tinto, seco
1 cullerada rasa de mel
Romeu, mellor fresco, pero valería seco e picado
3 dentes de allo
Zume e raiadura dun limón
Para o acompañamento:
1 kg e medio de patacas
Para a ensalada:
1 cogombro
Uns poucos ravos
1/2 cebola vermella
5 culleradas de aceite
5 culleradas de vinagre de viño branco
1 pomelo
1/2 cullerada de mostaza
1/2 cullerada de azucre

Parcelas de patacas na grella
Para evitar a rutina coas patacas, aquí propoñemos cociñalas na grella. O primeiro paso é cocer as nosas patacas 10 ou 15 minutos. Despois, escorrelas ben e engadir un dente de allo esmagado,  perexil e aceite de oliva. Mesturar ben. Logo, cortar catro cadrados de papel albal e repartir as nosas patacas. Facer unha boliña cos nosos anacos pero non pechar totalmente o papel albal. Así sairá a calor. Colocar na grella e deixar cociñar por outros 10-15 minutos.

Peixe con pesto de perexil
Para darlle un toque diferente a un peixe branco feito ó forno nada mellor que preparar un pesto de perexil para poñerlle por riba. Para o pesto: poñer dúas follas de romeu (picado se non se atopa fresco), un dente de allo e un ramiño de perexil na batedora. Tras batelo ben, engadir unha cullerada de queixo raiado e a raiadura de medio limón e mesturar outra vez. Unha vez batido, engadir o zumo de medio limón, un pouco de ceboliño picado e un chorriño de aceite de oliva xunto con sal ó gusto. Cando o peixe saia do forno só hai que esparexer este pesto de perexil por enriba e desfrutar!

Un queixo grego: haloumi
Para os que gusten dos queixos, a proposta hoxe é o haloumi, perfecto para unha cea lixeira ó carón dun boa ensalada. O haloumi é un queixo grego de textura singular (un pouco como goma) e sabor suave. Para preparalo só hai que cortalo en tiras dun centímetro ou centímetro e medio de grosor, pasalo por un pouco de fariña e facelo case á prancha, só cun chisquiño de aceite.

Aguacate, verde pero con calorías
Tendemos a pensar que todo alimento que é verde é baixo en calorías. Estiramos a man a froitas e verduras cando estamos intentando perder peso. A estratexia é boa, pero hai que saber que se elixe. Por exemplo, o aguacate é san, é bo, pero non tan ‘light’ como algúns pensarán e achega boa cantidade de calorías. Por esta razón convén medir a cantidade de aguacate en cada ración.

Hummus, máis sinxelo do que parece
Para facer 350 gramos de hummus:  Bater 400 gramos de garavanzos con 3 dentes de allo, 100 miligramos de aceite de oliva, un pouco de comiño e o zume dun limón. Cando todo estea mesturado, engadir catro culleradas de auga e bater outra vez. Engadir sal e pementa ó gusto. Para servir este hummus nada mellor que poñelo nun bol acompañado de panciños, torradas ou pan fresco.

Sopa de tomate de verán: outra opción
Para esta refrescante sopa: poñer nunha tarteira un pouco de aceite e rustrir unha cebola cortada fina e unha cenoria tamén en taquiños. Tras 4 minutos, engadir quilo e medio de tomates, sen pebidas e en cuartos xunto con dous dentes de allo picados e unhas follas de tomiño, unha de loureiro e deixar cociñar lentamente durante unha hora, tapado. Logo, é recomendable pasar esta sopa a outra tarteira e engadir tres culleradas de iogurt.