ECOS, fotoxornalismo a prol da inclusión e da visibilidade
Unha viaxe da man da etnia uigur de China, as mulleres de India e os nenos e nenas de Etiopía
A fotoxornalista madrileña Eva Garrido propón na exposición Ecos unha viaxe da man da etnia uigur de China, as mulleres de India e os nenos e nenas de Etiopía para non esquecer realidades que quedan polo camiño cando estes países alcanzan o protagonismo das conversas en Occidente.
Con esta mostra, que se pode visitar ata o 30 de xuño, o proxecto campUSCulturae pretende chamar a atención sobre os pobos esquecidos e contribuír á súa inclusión e visibilidade. A sida, aulas de ensino, rostros de mulleres, mercados, rúas con vida... imaxes todas elas que converten o Claustro do Colexio de Fonseca no corazón do mundo, como dixo Xosé Antonio Neira no acto de inauguración.
Instantáneas de realidades descoñecidas coas que a autora quere apelar á concienciación non só das persoas senón tamén dos medios de comunicación, que son instrumentos útiles para mostrar que outros mundos existen e que só dende a diversidade nos podemos entender, manifestou a xornalista.