O espectáculo benéfico "E ti, de quen ves sendo" recadou máis de 2.000 euros para a investigación do cancro infantil
Unhas 700 persoas asistiron ás dúas función programadas no Auditorio Municipal // Máis de 120 membros da academia de animación Nydia, de Vilagarcía, protagonizaron o festival
Preto de 700 persoas asistiron a pasada fin de semana no Auditorio Municipal ao espectáculo benéfico E ti, de quen ves sendo?, promovido pola academia de animación sociocultural Nydia, de Vilagarcía, coa colaboración do Concello de Valga para recadar fondos para o colectivo Nico Contra o Cancro Infantil.
O festival de imitacións de grupos e cantantes de distintas épocas subiu ao escenario a 120 integantes de Nydia, de entre 3 e 70 anos de idade, que protagonizaron interpretacións con voz en directo e vistosas coreografías. Na xornada do sábado programáronse dúas funcións (ás 17:30 e ás 20 horas) e, entre as dúas, a recadación pola venda de entradas superou os 2.000 euros. O donativo para presenciar o espectáculo era de 3 euros por persoa.
A cantidade recolectada destinarase íntegramente a financiar proxectos de investigación do cancro infantil a través do colectivo Nico, que toma o nome dun neno de 3 anos de idade de Ourense, diagnosticado de neuroblastoma. Esta asociación instalou, ademais, no Auditorio un stand de venda de obsequios e merchandising coa que recadaron outros 250 para a mesma causa.