Santiago
+15° C
Actualizado
jueves, 13 agosto 2020
01:31
h

Gaña o Nacional de Artesanía Elena Ferro, a zoqueira de Vila de Cruces

A viguesa Paula Ojea obtivo o de Produto // Quedaron finalistas noutras dúas categorías a Fundación Artesanía de Galicia e o obradoiro Anaquiños de papel

Dúas artesás galegas resultaron premiadas onte na XII edición dos Nacionais de Artesanía, cuxa cerimonia de entrega tivo lugar no Ministerio de Industria, Comercio e Turismo.

Elena Ferro, do obra­doiro Eferro (Vila de Cruces), recolleu o trofeo que a acredita como gañadora do Premio Nacional de Artesanía pola súa obra consolidada. Así mesmo, a ceramista e enxeñeira Paula Ojea, do obradoiro Ojea Studio (Vigo), resultou gañadora na categoría Premio Produto pola colección Cut&Fold, en recoñecemento ao mellor produto ou colección dos últimos dous anos. Ambas as dúas forman parte da marca Artesanía de Galicia.

O acto de entrega contou coa presenza da directora de Turismo de Galicia, Nava Castro, e a xerente da Fundación Artesanía de Galicia, Elena Fabeiro.

É a segunda vez que Galicia recibe o Premio Nacional, a máxima categoría das cinco nas que se dividen estes galardóns, co que foi distinguido o obradoiro de gaitas Seivane en 2006.

Catro candidaturas de Artesanía de Galicia optaron como finalistas das cinco categorías nesta edición. Ademais de Elena Ferro e Paula Ojea, nesta duodécima edición tamén foron seleccionados como finalistas noutras seccións a Fundación Artesanía de Galicia e o obradoiro Anaquiños de papel (A Coruña).

Os Premios Nacionais de Artesanía son convocados anualmente polo Ministerio de Industria, Comercio e Turismo co obxectivo de recoñecer as traxectorias e actuacións máis destacadas no eido da artesanía contemporánea.

Elena Ferro xa fora finalista en 2011, na categoría Premio Produto. Destaca polo seu traballo cun produto característico da tradición rural: os zocos de madeira. No taller familiar, en funcionamento desde 1915, veñen desenvolvendo o seu traballo artesán tres xeracións diferentes.

Co cambio no valor de uso do calzado de traballo, outórgalle un novo significado sen arrebatarlle a súa esencia, reinventándoo como complemento de moda con constantes innovacións en deseños, materiais e cores. A artesá dotou a este produto dun grao de innovación para adaptarse ás necesidades do mercado, novos usos e públicos.

A serie Cut&Fold de Paula Ojea caracterízase polas súas formas xeométricas imposibles, que segundo desde onde se observen se inclinan, semellando inestables. Son pezas que exploran contrastes, entre a precisión do deseño e a irregularidade artesanal.

Foron deseñadas con mentalidade e xeito de traballar propias da enxeñería e realizadas artesanalmente.

05 dic 2019 / 00:00
Noticia marcada para leer más tarde en Tu Correo Gallego
Tema marcado como favorito