Lecturas para este Nadal

Queremos recordar e recomendar como agasallo nestas festas as obras galegas e traducidas que recensionamos desde xaneiro a decembro deste ano, pois consideramos que merecen un lugar destacado nas librarías do público lector infantil e xuvenil.

Foron trece as obras galegas que se comentaron cos seguintes títulos: “Guerra, fuxida e esperanza” tratou o álbum A fuxida, de Berta Dávila, do que se dixo que ofrece a historia da fuxida de Nadia e a súa familia da contenda; en “A poesía, penúltima arma”, describiuse o poemario Penúltimas tendencias, de Carlos Negro, como unha réplica paródica contra o estereotipo das identidades baleiras da mocidade.