“A lexislación reléganos aos pais a meros visitadores”

O pasado luns os presidentes das asociacións Custodia Compartida Xa e Pais e Nais percorreron un tramo do camiño de Santiago para reclamar unha lei propia en Galicia que regule a implantación da custodia compartida. Jesús Orois, o presidente de Custodia Compartida Xa, argumentou en Radio Obradoiro a necesidade desta lei. A asociación superou xa as 15.000 sinaturas, a primeira meta que tiñan marcada, explicou Orois, as necesarias para presentar unha iniciativa lexislativa popular no parlamento.

Amósase contento verbo da evolución da asociación, "atopamos un apoio masivo por parte da cidadanía galega na rúa. Arredor dun 98% das persoas ás que solicitamos a súa sinatura asinan. Curiosamente, dentro dese 98% unha alta porcentaxe é apoio feminino". Un apoio das mulleres que considera moi positivo, xa que nestes momentos cando se produce un divorcio no 85% dos casos a custodia queda en mans das nais. A lexislación actual outórgallo a custodia de xeito exclusivo ás nais en máis dun 85% dos casos, relegándonos aos pais a meros visitadores.

Orois saúda que PP ou BNG sexan favorables a unha lei deste tipo, e critica a negativa do PSOE porque, a pesar de presumir de progresista, "está sendo secuestrado por un sector que condiciona as nosas reivindicacións". Orois recordou que a lei no País Valenciá foi recurrida polo goberno central, polo que lles pide aos gobernantes que exerzan o dereito civil propio de Galicia. "Hai que aproveitar para desenvolver o noso dereito civil e para defender os dereitos dos nosos fillos".