OS REIS MAGOS ADIANTAN A SÚA CHEGADA A VALGA PARA RECOLLER AS CARTAS DOS MÁIS PEQUENOS E REPARTIR LAMBETADAS
Estiveron na Escola Infantil Municipal, no CODI e visitaron aos usuarios do Centro de Día // Melchor, Gaspar e Baltasar tamén acudiron ao festival que celebraron en Chanteclair o CRA e os colexios de Baño e Cordeiro
Os Reis Magos estiveron esta mañá en Valga, saudando e enchendo de ilusión a os máis pequenos e visitando aos usuarios do CODI e do Centro de Día. Melchor, Gaspar e Baltasar, acompañados polos seus paxes, adiantaron a súa chegada á vila para recoller as últimas cartas dos rapaces e asegurarse de que ningún quedará sen xoguete este Nadal.
A súa visita comezou pola Escola Infantil Municipal, onde os nenos e o equipo educativo os recibiron con moita ledicia. Os Magos de Oriente repartiron caramelos entre os pequerrechos. A seguinte parada da comitiva real foi no CODI, para alegría dos seus usuarios, aos que tamén agasallaron con lambetadas.
Foi unha mañá de moito traballo para Melchor, Gaspar e Baltasar, que a continuación se desprazaron ata a sala de festas Chanteclair, onde o alumnado dos colexios Baño-Xanza e Xesús Ferro Couselo e das escolas unitarias de Campaña, Chenlo, Ferreirós, Forno, Vilarello e Xanza estaban a celebrar un festival de Nadal. No escenario os Magos instalaron o seu buzón real para que os nenos deixaran as súas cartas e foronos recibindo un por un. Ao remate desta festa, o alumnado regresou ás instalacións dos colexios de Baño e Cordeiro, onde degustaron churros aportados polo Concello e chocolate
Por último, os Reis fixeron tamén unha visita ao Centro de Día para saudar aos seus usuarios.