A Pobra e Ribeira arroupan ós atletas con módulos cubertos
Licitadas as ampliacións dos complexos de A Fieiteira e A Alta, orzamentadas en 1,3 millóns e 320.000 euros, respectivamente
Enzo López, deportista do Club de Atletismo Barbanza da Pobra, vén de proclamarse campión de España na categoría sub16 no campionato de inverno de lanzamento de xavelina. E este sábado, na II Xornada Intercomarcal Escolar Benxamín e Alevín de Noia, Sofía Paz e Álex Ordóñez gañaban en salto de lonxitude. Son só algunhas das novas promesas locais.
O alcalde da Pobra, Lois Piñeiro, levaba dúas semanas abrindo o seu correo electrónico co desexo de atoparse ca confirmación de que algunha empresa presentara oferta para o proxecto de construción dun módulo cuberto de atletismo no complexo polideportivo de A Alta. E, xusto no último día do prazo, presentáronse dúas empresas.
“Coa subida dos prezos a esperanza de que se presentara algunha era case inexistente. Sabemos que vai ir todo moi axustado, e podemos ter problemas semellantes aos que tivemos co polideportivo. Para evitar isto, a atención dos servizos técnicos e xurídicos será prioritaria para este expediente. O proxecto ten que executarse antes do inverno, pois está pensado para que os e as atletas podan adestrar en días de mal tempo. Tamén se poderán celebrar probas de velocidade para as categorías inferiores e probas de salto”, dixo Piñeiro.
O orzamento para a nova instalación é de 320.000 €, e contémplase a posibilidade de amplialo no futuro. Ocupará 1.045 m2 e incluirá unha pista de 60 metros de lonxitude máis 15 de freada, zona para salto de lonxitude e espazo para lanzamento de peso, martelo, disco e xavelina.
O módulo cuberto estará en funcionamento antes que a ampliación do Edificio de Usos Náuticos. E a concelleira de Deportes, Genoveva Hermo, xa traballa noutros proxectos de mellora para o campo de A Alta, entre eles a dotación dunha cabina de arbitraxe en condicións, fai tempo demandada polo club.
Pola súa banda, a Secretaría Xeral para o Deporte volveu sacar a licitación o pasado día 17 as obras de ampliación do complexo polideportivo de A Fieiteira, en Ribeira, a través da construción dun módulo cuberto de atletismo: unha intervención que resultara deserta cando se sacou a contratación no verán pasado a raíz do encarecemento de parte dos materiais.
O novo orzamento, tras actualizar os custes, ascende a 1.322.173 €. A actuación consistirá en prolongar a edificación que acolle a piscina climatizada cuberta en 35 metros lineais, habilitando ademais unha planta superior.
O resultado será unha renovada instalación de 1.900 m2, dos que 1.400 corresponderán á planta baixa.
O pavillón albergará unha zona de adestramento cuberta para atletismo mediante un módulo con pista de 5 rúas, zona de saltos e de lanzamentos, espazos para ximnasio, sala de musculación e actividades de tecnificación para a práctica do taekwondo, novos vestiarios, aseos e duchas e o correspondente equipamento. Farase a necesaria reforma para garantir a accesibilidade ó primeiro andar. A obra será cofinanciada polo Concello e a Secretaría Xeral para o Deporte.
Cando esté construído, a atleta Ana Peleteiro poderá escapar do frío de Guadalaxara para entrenar en Ribeira.