Dous detidos en Vilanova nun operativo antidroga cando sacaban do mar unha lancha

A Garda Civil detivo no marco dun operativo antidroga na madrugada deste venres a dúas persoas cando se dispuñan a transportar a terra unha lancha semirríxida de 15 metros de eslora que non dispuña de matrícula nin de folio na Ría de Arousa.

Os axentes sorprenderon aos dous individuos nun dos peiraos do porto de Vilanova de Arousa (Pontevedra) cando se dispuñan a devolver a embarcación a terra remolcándoa cun todoterreo, informaron fontes da investigación.

Ao advertir a presenza das forzas de seguridade os dous homes trataron de fuxir. Un deles botou a correr e foi interceptado de inmediato. O outro se arroxou á auga e fuxiu a nado até unha batea próxima, onde pouco despois foi detido por unha embarcación da Benemérita.

A lancha semirríxida, similar á que se adoitan utilizar nas descargas de droga, estaba completamente baleira no momento da súa aprehensión, indicaron.

HIPÓTESE

Fontes da investigación consideran que a hipótese máis probable é que a embarcación procedese de participar nunha descarga e que os seus tripulantes se dispuxesen a devolvela a algunha nave onde permanecería almacenada a resgardo, momento no que foron sorprendidos. Pero as mesmas fontes recoñecen que de momento se carece de probas que corroboren estas sospeitas.

Até o porto de Vilanova desprazouse na mañá deste venres un importante operativo por terra, mar e aire. A investigación segue aberta á espera de clarificar os movementos previos e o destino da embarcación ilegal.

VILANOVA. EUROPA PRESS