EL CORREO dará mañá un libro dos 30 anos da caída do Muro de Berlín

EL CORREO entregará mañá 30 anos xa, un libro do Atlántico do Noroeste Peninsular sobre os 30 anos da caída o Muro de Berlín pois mañá cúmprese ese aniversario.

A obra leva moitos artigos de análise nun proxecto que ten por director a Xoán Vázquez Mao.

“Este aniversario é un feliz pretexto para recordar as marcas indelébeis da Europa da posguerra, a importancia da caída do Muro de Berlín, a guerra fría e o sentimento de esperanza que esta Europa espertou e continúa a espertar en todos aqueles que acenaron á liberdade por entre as ruínas. Por iso, quixemos lembrar aquela que consideramos ser unha data clave na historia moderna de Europa e quixemos facelo da forma que cremos ser a mellor, fomentando o coñecemento, a reflexión e o debate plural en liberdade”, salientan os promotores deste libro.

Hai textos asinados por Andoni Aldekoa, Maria Lúcia Amaral, Manuel Campo Vidal e Anabel Campo Vidal, Aníbal Cavaco Silva, María Cerqueira, Arlindo Cunha, Luis Manuel García Mañá, Fernando González Laxe, Eneko Landaburu e José Luis Méndez Romeu, entre outros protagonistas desta visión coral.

A maquetación foi cousa de María Llauger e a coordinación da publicación de Emma Ben Álvarez e Chus Torres.

Esta coidada publicación chega cofinanciada polo Fondo Europeo de Desenvolvemento Rexional Feder a través do programa Interreg V-A España-Portugal (Poctep) 2014-2020.

AS CONSECUENCIAS Xosé Sánchez Bugallo, alcalde de Santiago, fala deste xeito sobre caída dese muro e as súas consecuencias.

“O ano 1989 foi un ano no que se produciron tres acontecementos históricos. Dous deles cambiaron radicalmente a vida das persoas en Europa e no mundo. Un foi a invención de internet como un espazo aberto polo enxeñeiro británico Tim Berners-Lee, o 12 de marzo de 1989. En novembro foi a caída do muro, pero polo medio pasa outro acontecemento: a matanza de Tiananmén. Tres acontecementos cunhas consecuencias e unha lectura moi diferente”.

“Eu vivín a caída do Muro de Berlín e as súas consecuencias, tan ben descritas na publicación 30 anos xa, de Edicións do Eixo Atlántico. O discurso confuso de Egon Krenz ante as preguntas do xornalista da RAI, a poboación que se dirixe ao Muro de Berlín, os gardas completamente desconcertados, que non saben que facer… E, ao final, cando Egon Krenz quixo aclarar ou modificar o sentido da súa contestación, os acontecementos xa o superaran e non puido facer nada. Unha marea humana desfixera o muro, abrira a conexión entre ámbolos dous lados”, sinala.

Gorvachov E Sánchez Bugallo engade: “A partir de aí produciuse toda unha serie de cambios en cadea descontrolados, desde o punto de vista do intento de Mijaíl Gorvachov que intentaba organizar na URSS e nos países membros do Pacto de Varsovia unha transición á española. É dicir, controlando desde o goberno os pasos que se estaban dando nesa evolución democrática. A partir da caída do Muro de Berlín o proceso adquiriu a súa propia dinámica, que acabou culminando case dous anos despois, co intento de golpe de estado contra Gorbachov e Boris Yeltsin proclamando a independencia de Rusia e separándoa da Unión Soviética”.

E remata o alcalde Bugallo: “A continuación, o o desmoronamento da URSS, coa proclamación da independencia de cada unha das 15 repúblicas que a constituían. E no resto dos estados satélites vinculados á URSS, tamén foron imparables os movementos populares de entón”;