O BNG de Brión quere ‘importar’ a conciliación e os comedores amesáns

A Maía. O BNG de Brión mantivo un encontro cos militantes do amesán para coñecer de primeira man o modelo de conciliación de que goza o municipio veciño, onde os nacionalistas contan con distintas áreas de responsabilidade. Entre outros aspectos, os edís brioneses Xosé Penas e Tito Souto puideron comprobar o “bo funcionamento dos comedores escolares”.

Precisamente, o modelo de xestión municipal dos comedores foi unha das cuestións que se puxeron sobre a mesa, hai escasas datas, na reunión que o Bloque de Brión mantivo coas catro asociacións de pais e nais do concello.

O candidato nacionalista á alcaldía de Brión, Xosé Penas, salienta que Concellos como Ames teñen un proxecto “elaborado, pactado e traballado” que implica a “todos os axentes implicados”, isto é, ás familias, á comunidade educativa e ao goberno local.

En Ames “concíbese a conciliación como un eixo que vertebra as políticas locais e que abrangue todo o día”, incide Penas. Na súa opinión, o modelo poderíase adaptar “parcialmente” a Brión e mesmo “dar pé a colaboracións mancomunadas”, precisaba.

Todo isto contrasta, segundo o BNG, coa “improvisación constante” de que fai gala o goberno local de Brión en materia de conciliación, “como se está vendo este outono co caos e desorde na xestión das actividades extraescolares municipais”, apuntan, lembrando que apenas un quilómetro separa dúas formas tan distintas de entender “a conciliación”. O.D. Vilar