Alfonso IX e a dama italiana volven ó porto de Camariñas

Camariñas. A vila camariñana viaxará o día 4 de setembro ao pasado para rememorar dúas visitas históricas: a do rei Alfonso IX en 1228 e a da dama italiana que, segundo a lenda, ensinou a palillar ás mulleres de Camariñas.

Será no marco do programa O Encaixe no Camiño, que promove, un ano máis, a Asociación de Empresarios e Promoción Turística de Camariñas, co patrocinio da Deputación da Coruña.

Os actos comezarán ás 11.00 horas coa saída da comitiva dende a Casa de Pedra cara o porto para recibir ao rei, que desembarcará ás 11.30 horas. De seguido recrearase a camiñata que fixo no seu día o monarca ata Cereixo (Vimianzo) facendo paradas e representacións teatrais en Xaviña e Cereixo.

Pola tarde, a partir das 18.00 horas, será a dama italiana quen desembarque no porto camariñán. Un momento que será teatralizado. Para conmemorar tales feitos, a vila de Camariñas engalanarase de época e nas súas rúas soarán as notas musicais dos grupos Vaiche Boa e Con todo en Banda.

As persoas interesadas en participar na andaina histórica deberán inscribirse previamente chamando ao número de teléfono 662 488 253. J. M.