Boa evolución xeral dos datos da COVID nos concellos de Costa da Morte
Os alcaldes agardan que este venres ou o martes se rebaixen algunhas restricións
Carballo. Responsables da Consellería de Sanidade mantiveron este mércores un novo encontro telemático cos alcaldes dos concellos de Bergantiños, Terra de Soneira e Fisterra afectados por restricións de mobilidade. Deron conta das cifras de casos activos e a incidencia da COVID destacando a “boa evolución”, especialmente nos municipios bergantiñáns e no de Vimianzo. Unha melloría que aínda non é tan apreciable no perímetro formado por Muxía, Dumbría e Cee.
De momento non hai cambios en canto ás restricións, aínda que os alcaldes agardan que se poidan rebaixar nalgunhas zonas nas reunións que manterán o subcomité e o comité de expertos, o venres e o martes da próxima semana, respectivamente. Non obstante, os responsables de Sanidade aseguraron que antes de levantar restricións deberán ter certa seguridade de que non se van ter que volver a implantar unha semana máis tarde.
Todos os concellos da comarca de Bergantiños están evolucionando ben, sobre todo Malpica e A Laracha, polo que non se descarta que nestes dous xa poida haber cambios o venres.
En Carballo, actualmente hai 103 casos activos, 53 menos que hai una semana. Tamén se reduciu substancialmente a incidencia a sete días, de 188 a 89, e a catorce días, pasando de 427 a 277, pero as autoridades sanitarias entenden que “esta melloría aínda non abonda para levantar ou reducir as restricións”, segundo sinalaron dende o Concello carballés. M. L.