Comezan os servizos de conciliación no Concello lousamián
Aínda quedan prazas dispoñibles que poden reservarse chamando á área de Igualdade
Lousame. O pasado xoves comezou unha nova edición do servizo Lousame Concilia, que se desenvolverá todos os días lectivos no CPI Plurilingüe Cernadas de Castro, en horario de 7.30 a 9.00 horas, e con todas as medidas de prevención fronte á COVID. O Concello de Lousame informa de que, rematado o prazo de inscrición, aínda quedan prazas dispoñibles para aquelas familias que precisen deste servizo de xeito puntual ou continuo.
Para acceder a este servizo os interesados só teñen que dirixirse á Concellería de Igualdade, chamando ao 981 820 494. Lousame Concilia é un programa de conciliación da vida laboral e familiar posto en marcha polo Concello lousamián e que conta coa colaboración da Consellería de Emprego e a Secretaría Xeral de Igualdade.
Campamento Uns servizos de conciliación comezan e outros finalizan. Esta semana rematou o Campamento de verán 2021 do Concello outense, enmarcado no programa Outes Concilia. Este abarcou todo o período vacacional das/os menores, iniciándose o 23 de xuño e finalizando o pasado mércores, 8 de setembro, na xornada anterior ao inicio do curso escolar.
Segundo indicaron, constou de 6 quendas, cun total de 200 prazas, as cales foron cubertas, quedando familias en listaxe de agarda. A maioría dos rapaces e rapazas eran do concello de Outes, que tiñan prioridade no acceso ao servizo, se ben tamén se beneficiarion nenos doutros municipios da contorna. m. t.