Ribeira Store ofrece envíos gratis ata Padrón ós comercios asociados

Ribeira. A Concelleira de Innovación Tecnolóxica do Concello de Ribeira, Ana Barreiro, presentou onte o plan de márquetin dixital da plataforma de comercio electrónico Ribeira Store, que contempla unha serie de medidas para promocionar semanalmente os artículos dos establecementos adheridos e desenvolver unha campaña de publicidade conxunta.

O plan ten como obxectivo publicitar en medios dixitais a citada plataforma, aumentar o número de visitantes e, como consecuencia, axudar a fomentar as ventas dos comercios ribeirenses.

Púxose en marcha onte e abarca, ata finais de febreiro, as campañas de Nadal, Reis e Rebaixas. Realizarase nas plataformas de Facebook e Instagram cunha estratexia de posicionamento nos buscadores. Tamén contempla os gastos de envío gratuítos para o municipio de Ribeira e para toda a comarca do Barbanza, ata Padrón.

Aínda que figuran rexistrados 130 establecementos na plataforma Ribeira Store, só 57 teñen actividade. Sin embargo, o Concello non considera un fracaso esta porcentaxe, pois, segundo Ana Barreiro, “trátase dun proceso vivo e, a medida que se vaian vendo os resultados desta ferramenta, iranse mobilizando máis tendas”. Asimesmo, indicou que “non todo o mundo ten a mesma confianza no comercio electrónico nen a mesma experiencia” e destacou o feito de que os dez mil usuarios das redes sociais municipais son potenciais clientes da plataforma.

Por outra banda, o market place ribeirense recibiu o recoñecemento do Ministerio de Industria, Comercio e Turismo cunha mención honorífica na categoría de ideas orientadas a dotar de solucións tecnolóxicas ás áreas comerciais urbanas, establecementos comerciais colectivos e/ou mercados municipais españois, sendo Ribeira, xunto con Alzira (Valencia) os únicos concellos de España que presentaron unha proposta similar. s. s.