Carballo vai promocionar as ventas no seu comercio local polo San Xoán

Carballo. Hai lugares nos que o San Xoán non é un día calquera. A tradición fai que esa data teña un significado especial. É o caso de Carballo, donde o Concello ademais de intentar ofrecer algunhas actuacións de pequeno formato durante os días grandes das festas, traballa noutras propostas que contribúan a paliar esta anómala situación derivada da crise sanitaria que se está a padecer e que tanto ten afectado á actividade económica en xeral e ao comercio en particular.

No Concello son conscientes de que o San Xoán sempre foi unha época forte para o comercio carballés polo que as concellarías de Festas, Promoción Económica e Mercados unen esforzos para intentar dinamizar as vendas a través dunha potente campaña de imaxe que incluirá como principais soportes a publicidade en medios de comunicación, vídeos e cartelería. A proposta foi aprobada pola Xunta de Goberno Local.

O lema da campaña, cuxa imaxe se dará a coñecer nos vindeiros días, será A festa levámola dentro, porque o San Xoán é unha celebración arraigada en Carballo, pero tamén porque é unha boa época para mercar no comercio local e levar a festa dentro das bolsas da compra. Por iso, o gasto que se realice nos establecementos colaboradores terán recompensa.

A campaña arrancará o próximo luns, día 14, e vaise estender ata fin de mes. Os comercios de Carballo que queiran participar deben inscribirse antes do venres tendo en conta que as prazas son limitadas. m.b.