Suspendeuse no pleno de Arzúa o cobro ás terrazas para o 2021
A proposta, que trata de axudar ao sector da hostalaría, foi aprobada por unanimidade
Arzúa. O goberno local de Arzúa propuxo na sesión plenaria de onte a suspensión da aplicación da ordenanza fiscal reguladora da taxa por ocupación de terreos de uso público por mesas e cadeiras, tribunas, taboados e outros elementos análogos. A proposta de conxelación desta taxa, que afecta maiormente á
instalación de terrazas por parte do sector da restauración, contou co respaldo de todos os partidos .
Con esta medida, recoñece o alcalde, José Luis García, “tratamos de axudar a un dos sectores máis afectados pola crise provocada pola pandemia”. A conxelación da taxa para o vindeiro ano é, en palabras do rexedor, “unha medida absolutamente necesaria tendo en conta a situación en referencia ás restricións que soporta o sector da restauración como consecuencia da covid-19”. Comprométese a seguir traballando “coa idea de xestionar os recursos dispoñibles do xeito máis eficaz e xusto posible”, sinalou.
A sesión plenaria celebrada onte tamén permitiu dar luz verde á modificación da ordenanza da taxa pola subministración de auga, conservación de contadores e acometidas. Esta modificación implica a actualización do recibo correspondente ao consumo de auga potable, que para o ano 2021 contará cunha rebaixa do 0,4%, dacordo co IPC. A.P.