Case un cento de persoas participaron no Cogomelar a fin de semana
As dúas derradeiras sesións foron online pero desenvolvéronse con gran éxito
Vedra. A asociación medioambiental Amabul, de Vedra, desenvolveu na fin de semana as dúas derradeiras sesións do Cogomelar. Unha iniciativa novidosa a nivel galego, posto que empregan un método chamado ‘Hábitat, cores e formas’, a través do cal os participantes van descifrando os cogomelos por fases para elaborar logo os seus propios cadernos de campo.
O pasado sábado, día 7, puxéronse en marcha dúas sesións telemáticas (unha pola mañá e outra pola tarde) e xuntáronse preto de cincuenca persoas en cada unha. “Era a primeira vez que se facía e seguro que repetiremos”, sinala o director de Amabul, Rubén Villasenín. Destacou asemade “a posibilidade de tirar de recursos virtuais” que proporcionou facer a actividade online. Puxo en valor tamén a “participación dos cogomeleiros e cogomeleiras que amosaron os cogomelos que recolleron previamente e trataron de identificalos dacordo ao método”.
A asociación puxo así punto e final a esta actividade micolóxica, non sin antes agradecer a colaboración recibida da Deputación “por financiar todo o entramado de actividades da Aula Ambiental Ulla+20”, a Chemi Traba e a FernandoBorja, Mónica, Romero e Paula.
Remata o Cogomelar, pero a entidade seguirá poñendo en marcha varias propostas. Agora mesmo xa está en activo o programa de prácticas curriculares, no que os participantes están a interpretar os paneis informativos do último tramo da ruta de San Xoán da Cova. A.P.