Ferida ao engancharlle o brazo unha máquina coa que moía o millo
Sucedeu no lugar de Sanfíns, en Vimianzo, e tivo que ser trasladada ao hospital de Cee
Vimianzo. Unha veciña do lugar de Sanfíns, pertencente á parroquia de Cambeda (Vimianzo) resultou ferida de gravidade este sábado ao quedarlle atrapado un brazo nunha máquina coa que estaba a moer millo.
Os bombeiros de Cee desprazados ata o lugar, coa axuda do persoal sanitario e de axentes da Policía Local e da Garda Civil de Vimianzo, conseguiron liberar o brazo da muller. Segundo sinalan, “a posible causa do atrapamento foi que levaba roupa solta e o eixe da máquina atrapouna e xirou levando o brazo con ela”. Debido ás feridas que presentaba foi evacuada de urxencia ao Hospital Virxe da Xunqueira de Cee.
Foi alertado o helicóptero de emerxencias para tentar de auxiliar a asistencia sanitaria de urxencia pero, ao parecer, non puido saír por mor do mal tempo reinante.
O CAE112 recibiu a chamada de alerta ás 14.28 horas e ata o lugar desprazáronse axentes da Policía Local de Vimianzo, persoal de Urxencias Médicas, Garda Civil e os membros da dotación de garda do parque comarcal de bombeiros, de Cee, que deron por finalizada a súa intervención ás 15.15 horas.
Os expertos lembran que hai que evitar utilizar roupas frouxas cando se traballa con este tipo de máquinas. M. L.