Música e foliada no castelo de Vimianzo co espectáculo ‘Deixaas’
Terra de Soneira. Deixaas chega este sábado, ás 19.00 horas, ao castelo de Vimianzo para inaugurar o proxecto local A Costa da Vida con música, foliada e magosto.
Mercedes Peón, Mónica Nut e Ana Fernández ofrecerán un recital no patio de armas da fortaleza.
O espectáculo é o resultado dunha intensa investigación sobre as posibilidades da arte sonora traída ao eido no que Peón se ergue como referente internacional: a música de raíz, a tradición máis xenuína. Amplía así o seu universo creativo combinando artesanía musical e vangarda creativa. Sen abandonar a base tradicional, o álbum inclúe unha faceta contemporánea inspirada en espazos acústicos de nova natureza e composicións que traballan coa palabra poética dramatizada.
Diferentes ambientacións e texturas que gañan peso nunha obra en directo, ofrecendo unha experiencia artística única con tres formatos. Terá unha duración de 75 minutos. M. Lavandeira