Muxía implanta o servizo de recollida de plásticos agrícolas
É gratuíto e o obxectivo é minimizar o impacto medioambiental
O Concello de Muxía comezou este xoves a prestar o servizo de recollida de plásticos agrícolas, cuxa xestión depende directamente da Administración local. É totalmente de balde e execútase de luns a venres, en horario de 10.00 a 13.30 horas. Só hai que chamar ao teléfono 981 74 20 01, indicando nome e apelidos, enderezo, teléfono e ubicación dos mesmos.
Unha vez ordenada a relación de solicitudes, organizarase para proceder trimestralmente á recollida do material. Tanto agricultores e gandeiros dobrarán e empacarán os plásticos da mellor maneira posible. Os plásticos deben ter a menor suciedade posible e evitarase que conteñan outras materias impropias que poidan dificultar os traballos de reciclaxe e tratamento final de recuperación para novos usos. Nese caso, a recollida será rexeitada.
O concelleiro de Medio Rural e Parroquias, Javier Romar, destaca que “a prestación deste novo servizo suporá un avance moi importante para minimizar o impacto medioambiental dos plásticos en todo o municipio.”