Nace a Plataforma Vendaval Costa da Morte para frear a 'ameaza' eólica

Un grupo de mulleres e homes de diversos puntos reuníronse en Ameixenda (Cee) para fundar a Plataforma Vendaval Costa da Morte, que nace co obxectivo de “defender o territorio das ameazas de proxectos eólicos”, afirman.

“O noso obxectivo fundamental é protexer zonas de especial sensibilidade como Banle ou San Pedro Mártir e preservar territorios virxes de viraventos como os concellos de Fisterra, Corcubión e Cee. Queremos que esta plataforma sexa un vento a favor que arrastre os intereses especuladores que hai detrás destes proxectos, verdadeiros polígonos industriais que hipotecan o futuro da nosa comarca”, engaden.

Din que a plataforma está a favor das enerxías renovábeis e das comunidades enerxéticas “sempre que a planificación sexa con criterios de utilidade de beneficio público, social e económico e, sobre todo, cun escrupuloso respecto ao medio ambiente”. Elaborarán un manifesto coas súas demandas o cal farán público a través dos medios de comunicación e entregarán a todos os concellos da Costa da Morte.