Semescom alega contra os proxectos eólicos na contorna dos Penedos
Argumentan razóns lexislativas, científicas, culturais, históricas e tamén arqueolóxicas
Vimianzo. O Seminario de Estudos Comarcais da Costa da Morte (Semescom) presentou alegacións contra os proxectos dos parques eólicos Monte Chan e Pena dos Mouros “por ameazar os Penedos de Pasarela e Traba e a serra costeira da Pena Forcada”.
Respecto ao primeiro, argumentan razóns lexislativas, dado que os Penedos están declarados Paisaxe Protexida, e tamén científicas e naturais amparándose en estudos xeolóxicos e xeográficos. Aducen tamén razóns arqueolóxicas, históricas, culturais e literarias, ademais das económicas, centradas sobre todo no ámbito do turismo.
En relación co proxecto de Pena dos Mouros, dende Semescom entenden que “os muíños eólicos danarían e invalidarían a chamada Ruta dos Penedos do Piñeo”, e sinalan que mesmo a Secretaría Xeral de Turismo cita a Pena dos Mouros como “un dos catro cumes da paisaxe protexida Penedos de Pasarela e Traba”. O parque afectaría tamén á Ruta dos Naufraxios da Costa da Morte e ao popular Camiño dos Faros.
Piden á Consellería de Medio Ambiente “que transforme esta ameaza contra os Penedos nunha oportunidade para a posta en valor desta Paisaxe Protexida e convertela no Parque Granítico Multiforme de Galicia”. J. M. R.