Cincuenta ribeirenses ‘lánzanse’ ó Camiño dende o faro de Corrubedo
Completaron un traxecto de 16,7 kilómetros que os conduciu polo dolmen de Axeitos e a capela da Guía // A nova comisaría expide credenciais do peregrino
Medio cento de veciños do municipio de Ribeira animáronse o pasado domingo a emprender a primeira etapa do Camiño de Santiago dende Barbanza. O presidente da Asociación de Amigos do Camiño A Orixe, Manuel Mariño Nin, abriu o evento ás nove da mañá aos pés do faro de Corrubedo cunha disertación sobre as singularidades deste itinerario terrestre de acompañamento da traslatio do apóstolo, cuxos restos entraron por mar a través da bocana da rúa de Arousa, segundo conta a tradición xacobea.
A continuación os camiñantes iniciaron un traxecto de 16,7 kilómetros que os conduciron ata a Capela da Guía, en Carreira, tras atravesar diversos puntos de interese como o Outeiro de Santiaguiño, a Igrexa de Santa María de Olveira, o Dolmen de Axeitos ou o conxunto etnográfico dos muíños de Amendo.
Entre os participantes atopábanse os concelleiros Juana Brión, María Sampedro, Víctor Reiriz, Ana Barreiro e Ramón Doval.
A intención é que en próximas fins de semana a medida que as axendas e o tempo o permitan realizar o resto de etapas aproveitando as fins de semana ata chegar á catedral compostelá.
Por outra banda, dende o Concello de Ribeira informaron de que a nova comisaría de Policía de Ribeira sita na avenida das Airós, 21, expide as credenciais do peregrino imprescindibles para certificar o paso ordenado polos distintos núcleos e fitos da ruta xacobea. Pódense solicitar na oficina de denuncias.
··· O Camiño de Santiago A Orixe conta cun percorrido de 120 kilómetros que conectan o faro de Corrubedo (Ribeira) coa capital galega a través de 6 etapas.
··· Este trazado invita a viaxar ao peregrino ao punto de partida da tradición xacobea seguindo, a través das terras do Barbanza, o curso da ría de Arousa, que á altura de Rianxo se funde co Ulla. Pois segundo a tradición, foi por este río por onde chegou a Galicia a barca que trasladaba o corpo do Apóstolo Santiago.
··· Este itinerario está impulsado pola Asociación de Amigos do Camiño do Barbanza e Arousa coa colaboración da Mancomunidade de Municipios de Arousa Norte, da que forman parte os concellos de Ribeira, A Pobra do Caramiñal, Boiro e Rianxo.
··· O traxecto conta co recoñecemento da Igrexa.