Dá comezo en Boiro un curso de cociña con prácticas en firmas locais
Participan 10 desempregados, que obterán un certificado de profesionalidade ó rematalo
O Concello de Boiro está levando a cabo o Programa Integrado de Emprego Boiro Emprega, que ten como obxectivo a formación de persoas desempregadas para a súa inserción laboral.
Na mañá deste xoves deu comezo o curso de Operacións Básicas de Cociña que se vai levar a cabo ata decembro no Centro de Formación e Viveiro de Empresas.
Os dez participantes obterán un certificado de profesionalidade de Operacións Básicas de Cociña, e o curso vai ter unha duración de 270 horas de formación no centro e outras 80 de prácticas en varias empresas da comarca.
O obxectivo é fomentar a inserción laboral nos principais sectores produtivos do Barbanza para promover así a contratación local.
No mencionado plan participan un total de cen persoas desempregadas que están a realizar un plan formativo e de orientación laboral en función dos seus intereses, tendo en conta un itinerario de emprego personalizado.
A formación que se está impartindo ten como finalidade que o alumnado participante obteña os coñecementos e competencias transversais para a procura do emprego.
Na xornada deste xoves impartiuse a primeira clase do citado curso de Operacións Básicas de Cociña, que vai ter unha duración de 350 horas.
O alumnado recibiu previamente formación en aspectos como a manipulación de alimentos, o manexo de carretillas elevadoras, a prevención de riscos laborais ou as competencias dixitais básicas, como márquetin dixital.