Recollen residuos especiais en Malpica

Bergantiños. A empresa Collecting Oil está a realizar esta semana unha nova recollida de residuos urbanos especiais en Malpica. O percorrido polas casas comezou este martes e continuará o xoves por Filgueira, A Fonte dos Bois, Seixas, Vilarnovo, Piñeiros, Rúa Ventorrillo, Pedra Queimada, As Neves, A Camuza e Travesía I A Camuza. A última xornada será o venres nas rúas Ventorrillo, Escorial e Emilio González López.

A iniciativa foi promovida pola concellaría de Turismo, Festexos, Policía e Tráfico, Seguridade Cidadá e Protección Civil, Medio Rural, Mar e Servizos, que preside Alfredo Cañizo. Esta recollida inclúe ata oito tipoloxías de residuos: aceite de cociña usado (de fritura, de conservas); graxas e manteigas; pilas e baterías; bombillas (de baixo consumo, LED e fluorescentes); electrodomésticos e equipos electrónicos; consumibles de impresoras; residuos textís e roupa; e restos metálicos pequenos do fogar: enxoval, tixolas, moldes, ou potas, entre outros. M. L.