Voluntarios para limpar o castro de Montesclaros da Laracha
Este mércores presentáronse as actividades medioambientais e arqueolóxicas que recolle o programa
A Laracha. A directora xeral de Xuventude, Cristina Pichel, presentou este mércores na Laracha o campo de voluntariado Castro de Montesclaros, enmarcado na Campaña de Verán da Xunta de Galicia. Esta actividade, centrada en obradoiros medioambientais, sendeirismo e distintas excursións turísticas de interese, tamén inclúe iniciativas como xogos deportivos ou a elaboración de debuxos arqueolóxicos.
Os participantes levarán a cabo labores de mantemento no castro, que irán dende a delimitación do terreo ata a súa limpeza coa poda das frondosas e a eliminación da cuberta vexetal. Ademais, traballarase na protección da biodiversidade, animal e vexetal da zona.
A directora xeral, que estivo acompañada polo alcalde, José Manuel López, e concelleiros do goberno, puxo en valor o labor destas iniciativas, porque fomentan “a educación en valores, o traballo en equipo, a cultura solidaria e a preocupación polo medioambiente”. M. L.