Melide continúa aderezando as fins de semana con obras teatrais

Melide. Este domingo, día 18, os melidenses teñen unha cita no centro sociocultural Mingos de Pita, ás 19.00 horas. Stephy Llaryora e Sergio Macías visitarán o municipio para representar a comedia Running, unha obra da produtora De Ste Xeito, que está dirixida por Esther F. Carrodeguas.

O espectáculo relata a historia de Xulia e Román, que acaban de coñecerse. Cando deciden quedar aparecen os problemas: os fillos de parellas anteriores, nais divorciadas, avós na residencia, adolescentes co pavo, o pequeno coa crise dos 8, os grandes coa dos 40, clases de ioga para liberar o estrés, e ser taxista, das fillas, dos fillos... É dicir, un sinfín de responsabilidades que lles deixan moi pouco tempo para coidar deles mesmos. A entrada é de balde e hai que reservar previamente en reservasculturais@concellodemelide.gal ou no 981505003, EXT 2122, de luns a venres. A.P.